თურქმა მესაზღვრეებმა სარფის საბაჟო გამშვებ პუნქტზე საქართველოს ორი მოქალაქე დააკავეს, მათგან ერთ-ერთი სამგზავრო ჩანთაში იყო მოთავსებული და საზღვრის ამ ფორმით გადაკვეთას ცდილობდა. ინფორმაციას მომხდარის შესახებ თურქული მედია ავრცელებს.

შემთხვევა 20 თებერვალს, დილით მოხდა. თურქი მესაზღვრეების ყურადღება მიიქცია საქართველოს მოქალაქე მამაკაცის ქცევამ, რომელსაც მოსთხოვეს ჩანთის გახსნა, იქ კი ქალი აღმოჩნდა. დაკითხვის შემდეგ გაირკვა, რომ აღნიშნული პირი თურქეთში ყოფნის პირობების დარღვევისთვის სამი თვის წინ ქვეყნიდან გააძევეს. ამჟამად ორივე პირი დაკავებულია.

სამგზავრო ჩანთით ქვეყანაში უკანონოდ შეღწევის მსგავსი ფაქტი სარფის საბაჟოზე თურქმა მესაზღვრეებმა სამი დღის წინაც აღკვეთეს.