ევროპული საქართველო შარლ მიშელის ახალ დოკუმენტს ხელს არ აწერს. ამის შესახებ On.ge-ს პარტიის პრესსამსახურში დაუდასტურეს.

დოკუმენტს ინდივიდუალურად აწერს ხელს პარტიის ყოფილი თავმჯდომარე, დავით ბაქრაძე.

"მე, როგორც პარლამენტის ინდივიდუალური წევრი, ხელს ვაწერ ამ შეთანხმებას იმიტომ, რომ ეს შეთანხმება სჭირდება საქართველოს ევროპულ და ევროატლანტიკურ მომავალს; იმიტომ, რომ ჩვენ გვჭირდება, რომ პრეზიდენტმა მიშელმა, ჩვენმა მეგობრებმა ბრიუსელში და ვაშინგტონში დაინახონ, რომ ქართული საზოგადოება იმსახურებს დახმარებას, თანადგომას და იმსახურებს უკეთეს მომავალს; ხელს ვაწერ იმიტომ, რომ ამ შეთანხმებით უნდა დავასრულოთ უკანონოდ, უსამართლოდ და პოლიტიკური ნიშნით დაპატიმრებული ადამიანების არსებობა, შევამციროთ პოლარიზაცია და გავხსნათ გზა უკეთესი არჩევნებისკენ", — განაცხადა ბაქრაძემ ხელის მოწერის დროს.

ქართულ ოცნებასა და ოპოზიციის ნაწილს შორის შეთანხმების დოკუმენტზე ხელმოწერის ცერემონია ორბელიანის სასახლეში გაიმართა.