პარტია გირჩის წევრები — იაგო ხვიჩია, ვახტანგ მეგრელიშვილი, ალექსანდრე რაქვიაშვილი, ჰერმან საბო და ლევან ჯგერენაია ორშაბათს, 19 აპრილს, პარლამენტში მივლენ. პარტიის ერთ-ერთი ლიდერის, იაგო ხვიჩიას თქმით, ისინი არ აპირებენ საპარლამენტო საქმიანობაში მონაწილეობას, თუმცა ისარგებლებენ პარლამენტარის გარკვეული პრივილეგიებით.

"განსხვავებით ჩვენი კოლეგებისგან, ჩვენ არ ვიღებთ არც ხელფასებს და არც პარტიულ დაფინანსებას. არ მივიღებთ მონაწილეობას პარლამენტის რეგლამენტით გათვალისწინებულ საქმიანობებში, ანუ, ზოგადად პარლამენტის სხდომებში, საკომიტეტო მოსმენებში, კომისიებში და ა.შ. არც მივლინებებში და არც მსგავს რაღაცებში. თუმცა, გამოვიყენებდით პარლამენტის წევრის გარკვეულ პრივილეგიებს, მაგალითად იმუნიტეტს, რომელიც გვაქვს, როგორც პარლამენტის წევრებს და ზოგადად, მე მგონია, რომ გვჭირდება ამ პოლიტიკურ რეალობაში, რა საგიჟეთიც გვაქვს მოწყობილი. მიუხედავად იმისა, რომ მას ფასი დაუკარგა ნიკა მელიას საქმეზე ხელისუფლებამ.

ასევე, გვინდა და ვისარგებლებთ იარაღის ტარების უფლებით. მესამე საკითხი იყო პარლამენტის შენობაში პრეს-ბანერი რომ არის პარლამენტის, საიდანაც ჩემი კოლეგები იძლევიან ხოლმე ინტერვიუებს, მაგ პრეს-ბანერით სარგებლობა. შესაბამისად გვინდა, რომ გავიცნოთ, ზოგადად, ეს პარლამენტის შენობა. გვინდა, რომ გირჩის სამეფო გადავიტანოთ პარლამენტის შენობაში და საარჩევნო კამპანია შემდეგი ნებისმიერ არჩევნებისთვის ვაწარმოოთ პარლამენტის შენობიდან", — ამბობს გირჩი.

მისი თქმით, ბოიკოტის მიუხედავად, გარკვეულ პრივილეგიებს ყველა იყენებს. ხვიჩია ფიქრობს, რომ დეპუტატის პრივილეგიების არგამოყენება აბსურდია.

"ყველა იყენებს გარკვეულ პრივილეგიებს, ჩვენი კოლეგები. მაგალითად, იყენებენ პრივილეგიებს ხელფასის და საბიუჯეტო დაფინანსების ამბავში, იმუნიტეტის ამბავში, ღამე საშვით გადაადგილების ამბავში და ა.შ. ჩვენც ვთქვით, რომ ასეთი ტიპის პრივილეგიების არგამოყენება აბსურდია", — განაცხადა იაგო ხვიჩიამ.