დუბლინის კოლეჯის მკვლევრებმა მარსის უძველეს ხეობაში მიწის ნაწილი აღმოაჩინეს, რომელიც არც ისე დიდი ხნის წინ წყლით იყო დატბორილი.

ერთ-ერთი მკვლევარი, მარი ბურკე აცხადებს, რომ მარსზე ისეთივე კვალი შენიშნეს, როგორსაც დედამიწაზე უდაბნოს ქვიშის დიუნების პერიოდული დატბორვა ტოვებს.

"წარმოიდგინეთ ჩვენი აღტაცება, როცა დავათვალიერეთ მარსის ზედაპირის თანამგზავრული ფოტოები და დავინახეთ ნაცნობი ტექსტურა, რომელიც იმაზე მეტყველებდა, რომ ამ ადგილას წყალი იყო", - ამბობს დუბლინის უნივერსიტეტის პროფესორი.

ნამიბიის უდაბნოს შორიდან შესწავლისას მეცნიერებმა ადრევე შენიშნეს რკალისებრი ზოლები ზედაპირზე მიგრირებად ქვიშის დიუნებს შორის. საველე სამუშაოებმა საბოლოოდ დაადასტურა, რომ ეს რკალისებრი ტექსტურა აორთქლებადი მიწის წყლის მარილების შედეგად წარმოიქმნება.

მარსის ქვიშის დიუნები წარმოადგენს მტკიცებულებას, რომ წყალი აქტიური იყო მარსის ეკვატორთან ახლოს არც ისე შორეულ წარსულში. ეს ადგილმდებარეობა პოტენციური გეოლოგიური სამიზნეა წარსულში არსებული სიცოცხლის ფორმების აღმოსაჩენად წითელ პლანეტაზე, რაც უმნიშვნელოვანესი მინიშნებაა მათთვის, ვინც სამომავლო მისიისთვის საინტერესო პუნქტებს ეძებს.