სოფელ გუმათში შეკრებილმა ნამახვანჰესის მშენებლობის მოწინააღმდეგეებმა პროტესტის ნიშნად ENKA-ს ოფისთან გზა გადაკეტეს.

აქტივისტების განცხადებით, ისინი ჩვეულებრივად გაატარებენ ადგილობრივ მოსახლეობას, ჩაკეტილი იქნება მხოლოდ ENKA-ს მანქანებისთვის.

აქტივისტი ვარლამ გოლეთიანი აცხადებს, რომ მათი კითხვები ლეგიტიმურია და პასუხი უნდა მიიღონ. მანვე აღნიშნა, რომ ხელისუფლების ეს ქმედებები გამოიწვევს მასშტაბურ აქციას თბილისში, არა იმიტომ, რომ დააორგანიზებენ, არამედ იმიტომ, რომ საზოგადოება თავის ბრაზს გამოხატავს.

რიონის ხეობაში პროტესტი გრძელდება. აქტივისტები აცხადებენ, რომ პროტესტს გააგრძელებენ, ვიდრე მათ რიონის ხეობაში გადაადგილების უფლებას არ მისცემენ.

გუშინ, სოფელ გუმათში გამართული საპროტესტო აქციის დროს დაპირისპირება იყო აქტივისტებსა და პოლიციას შორის. მას შემდეგ, რაც აქტივისტები პოლიციამ სოფელ ნამახვანისკენ არ გაუშვა, მათ მანქანებით მსვლელობა მოაწყვეს ქუთაისისკენ.

"ხელისუფლებამ ისინი [პოლიციელები] აქცია მხოლოდ დავალებების შემსრულებლად და უბედურება ის არის, რომ დავალება არის უკანონო, უსამართლო და ადამიანების შეურაცხმყოფელი", — ამბობს აქტივისტი მაკა სულაძე TV პირველთან საუბარში.

საპროტესტო აქციების ერთ-ერთი ლიდერის, ვარლამ გოლეთიანის განცხადებით, თუ მათ არ ექნებათ პროტესტის მშვიდობიანად გაგრძელების შესაძლებლობა სოფელ ნამახვანში, პროცესი დადაქალაქში გადაინაცვლებს.

ნამახვანისკენ გზა პოლიციას მას შემდეგ აქვს ჩაკეტილი, რაც 11 აპრილს, სოფელში აქტივისტების საპროტესტო კარვების დაშალეს. იმერეთის, რაჭა-ლეჩხუმისა და ქვემო სვანეთის პოლიციის დეპარტამენტის დირექტორმა, სულხან თამაზაშვილმა აქტივისტებს განუმარტა, რომ პოლიცია უზრუნველყოფდა კარვებისა და სხვა ინვენტარის გადატანას იქ, სადაც აქცია გაგრძელდებოდა, მაგრამ "სპეციალური საპოლიციო ღონისძიებების" გამო კარვები ნამახვანში ვერ გაიშლებოდა.

აქტივისტები აცხადებენ, რომ მას შემდეგ, რაც პოლიციამ სოფელ ნამახვანში მათი კარვები დაშალა, ჰესის მშენებელმა კომპანია ENKA-მ ის ტერიტორია გადახნა. ENKA-ში აცხადებენ, რომ აღნიშნული ტერიტორია 2019 წლიდან ნამახვანჰესის პროექტის საკუთრებაა.

გაიგეთ მეტი: