ერთ-ერთი ფრანგული ტელეკომპანიის დოკუმენტური ფილმის თანახმად, პანდემიის შეზღუდვების ფონზე რესტორნებში პარიზული ელიტისთვის საიდუმლო წვეულებები იმართება. ერთ-ერთმა ორგანიზატორმა კი განაცხადა, რომ მსგავს ღონისძიებებს საფრანგეთის მთავრობის წევრებიც ესწრებოდნენ.

AP-ს ინფორმაციით, პარიზის პროკურატურამ აღნიშნულ საქმეზე გამოძიება უკვე დაიწყო. ამასთან, მთავრობის წევრები უარყოფენ, რომ კოლეგების რაიმე უკანონო საქმიანობის შესახებ ინფორმაციას ფლობენ.

საფრანგეთში რესტორნები ოქტომბერში დაიკეტა. დოკუმენტურ ფილმში, რომელიც ტელეკომპანია M6-მა მოამზადა, კაცი ყვება, რომ ორ-სამ "მიწისქვეშა რესტორანში" იყო, სადაც მინისტრებიც იყვნენ. მოგვიანებით, ამ კაცმა ბრალდებები უარყო, თუმცა პროკურატურაში აცხადებენ, რომ გამოძიებას გააგრძელებენ.

როგორც M6 იუწყება, მათ ორი სხვადასხვა ადგილიდან ფარული კადრები მიიღეს. ერთ-ერთ ადგილის მფლობელი ამბობს, რომ იქ სტუმრებს ნიღაბი არ უკეთიათ, მიუხედავად იმისა, რომ დახურულ სივრცეში ტარება აუცილებელია, "რადგან ეს კერძო კლუბია, და სურთ, რომ ხალხმა საკუთარი თავი სახლში იგრძნოს". კიდევ ერთ ადგილას, სრუმრები წითელ ხალიჩაზე დადიან.

ევროპის ქვეყნებს შორის საფრანგეთში კორონავირუსის ყველაზე მეტი 4,8 მილიონზე მეტი შემთხვევაა დაფიქსირებული. ამასთან, გარდაცვლილია 97 ათასი ადამიანი.