დაავადებათა კონტროლი ცენტრის ხელმძღვანელის, ამირან გამყრელიძის განცხადებით ქვეყანაში ვაქცინაციის ტემპი უნდა დაჩქარდეს. როგორც ის აღნიშნავს, დღეში სულ მინიმუმ 3 000 ადამიანი უნდა იცრებოდეს.

"გავაინტენსიუროთ უფრო მეტად აცრა. დღეის მდგომარეობით, აცრილია 11 603 ადამიანი. დღეში საშუალოდ გვაქვს 1 000 აცრა, გარკვეული ჩავარდნა იყო ამ დიდი ტრაგედიის შემდეგ, ახლა ყოველდღიურად 1 000-ზე ოდნავ მეტია, მაგრამ ეს ცოტაა. ამ ეტაპზე გვჭირდება მინიმუმ 3 000 აცრა დღეში", — აღნიშნავს გამყრელიძე.

საქართველოში ვაქცინაცია 15 მარტს დაიწყო. ქვეყანაში AstraZeneca-სა და Pfizer-ის ვაქცინებია. 3 აპრილს კი ბაზარზე ჩინური სინოფარმი შემოვიდა, რომელიც ჯანდაცვის მსოფლიო ორგანიზაციიდან ავტორიზაციას ელოდება. ჯანდაცვის სამინისტროში აცხადებენ, რომ ჯანმოს მიერ ვაქცინის რეგისტრაციის შემდეგ, ის მოქალაქეებისთვისაც იქნება ხელმისაწვდომი.

ვაქცინაციის პროცესში ჩართვა შეუძლია ნებისმიერ მოქალაქეს 55 წლის ზემოთ, ასევე, სამედიცინო პერსონალს, დიალიზის საჭიროების მქონე პირებსა და ორგანოგადანერგილებს.

ვაქცინისთვის ჩაწერა და პრეპარატის არჩევა შესაძლებელია პლატფორმაზე Booking.moh.gov.ge.