წუხელ, 4 აპრილის ღამეს, პოლიციამ აქტივისტები კომენდანტის საათის დარღვევისთვის 2 000-2 000 ლარით დააჯარიმა. მანამდე, მთელი დღის განმავლობაში სამართალდამცავი უწყების წარმომადგენლები მათ სოფელში, კარვებთან არ უშვებდნენ. ამიტომ აქტივისტები სოფელ გუმათში, მანქანაში იმყოფებოდნენ. ინფორმაცია დაჯარიმების შესახებ მთის ამბებმა გაავრცელა.

"ოქმების შედგენა მოხდა კანონდარღვევით, ჩვენ არ დაგვირღვევია კომენდანტის საათი, მით უმეტეს, ძალიან მკაფიოდ და გარკვევით გვქონდა შეთანხმებული, რომ ჩვენი დღევანდელი თავშეყრა გუმათთან არ ესახურებოდა გუმათთან თავშეყრას და საბოლოო ლოკაცია, სადაც მივდიოდით, იყო ნამოხვანის კარვები. პოლიციამ იცოდა, რომ მივდიოდით იქ ღამის გასათევად, შეგვაჩერა გუმათთან, ვერ მოგვცეს ვეანაირი საბუთი, რაც მათ აძლევდა კანონიერ სფუძველს ჩვენი შეჩერებისთვის", — ამბობს აქტივისტი მირზა ნოზაძე მთის ამბებთან.

მისივე ინფორმაციით, პოლიციამ კომენდანტის საათის დარღვევისთვის 2 000 ლარით 12 ადამიანი დააჯარიმა, მიუხედავად იმისა, რომ მათ განუმარტეს, არ ჰქონდათ წასასვლელი, გარდა ნამოხვანის კარვებისა, სადაც ისევ პოლიციელები არ უშვებდნენ.

ნოზაძე ამბობს, რომ ოქმებს იურისტები გაასაჩივრებენ და სასამართლოს აუცილებლად მოიგებენ.

"მათ ჰქონდათ მიზნად, რომ ოქმები შეედგინათ ჩვენთვის და ამით დაესაჯათ ჩვენი აქ შეკრება", — აღნიშნავს ის.

კიდევ ერთი ადამიანი, პაატა ბენიძე ყვება, რომ დაჯარიმებამდე ისინი მანქანაში ისხდნენ და პოლიციამ ძალის გამოყენებით გადმოიყვანა.

"აბრახუნებდნენ მინაზე, ყვიროდნენ, ძალით გაგვიღეს კარები, სათითაოდ გადმოდით ყველა, სათითაოდ ჯარიმები უნდა დაგიწეროთო. გადმოვედით და აგერ მაქვს ჯარიმა", — ამბობს ის.

დღეს, 12:00 საათზე რიონის ხეობაში აქცია გაიმართება, რომლის მოთხოვნა კარვებთან აქტივისტების შეშვებაა. ადგილზე კვლავ მობილიზებულია პოლიცია. გუშინ, სამ აპრილს ხეობაში ტექნიკის ამუშავებას დაპირისპირება მოჰყვა და პოლიციამ ორი ადამიანი დააკავა. აქტივისტები ამბობენ, რომ ენკამ სამუშაოები განაახლა, კომპანიის განცხადებით კი, ეს წინამოსამზადებელი სამუშაოებია.

პოლიციას სოფელში შესასვლელი მთელი დღის განმავლობაში ჩაკეტილი ჰქონდა და მოქალაქეებს ჰესის მოწინააღმდეგეთა კარვებთან არ უშვებდა. ამასთან, ადგილზე მყოფი ადამიანები ამბობენ, რომ შსს სიგნალს ახშობს, რის გამოც კომუნიკაცია შეუძლებელია. თუმცა შსს ამტკიცებს, რომ ადგილზე მყოფი სპეციალური სატრანსპორტო საშუალება რადიოკავშირის გამართულ მუშაობას უზრუნველყოფს.