რიონის ხეობაში დაპირისპირება იყო, რომელიც ტექნიკიას ამუშავებას მოჰყვა. აქტივისტები ამბობენ, რომ ენკამ სამუშაოები განაახლა, კომპანიის განცხადებით კი, ეს წინამოსამზადებელი სამუშაოებია.

ტერიტორიაზე იმყოფებოდა ენკას ახალი დირექტორი, მერაბ ლომინაძეც. როგორც შსს-ში On.ge-ს უთხრეს, დაპირისპირებისას დააკავეს ორი ადამიანი და სამართალწარმოება მიმდინარეობს ადმინისტრაციულ სამართალდარღვევათა კოდექსის 166-ე და 173-ე მუხლებით, რაც წვრილმან ხულიგნობასა და პოლიციელის მოთხოვნისადმი დაუმორჩილებლობას გულისხმობს.

აღსანიშნავია, რომ ლომინაძე დღეს აქტივისტებს შეხვდა, თუმცა პოლიციის თანხლებით, რამაც უკმაყოფილება გამოიწვია და შეკრებილები ამბობენ, რომ ეს მუქარად აღიქვეს. გარდა ამისა, აქციის მონაწილეების პოზიციაა, რომ მათი კითხვების ადრესატი ხელისუფლებაა და არა კომპანია, ამიტომ ისინი პრემიერმინისტრ ღარიბაშვილთან შეხვედრას ითხოვენ.

"დირექტორი არ არის ადრესატი იმ კითხვების, რაც ჩვენ გვაქვს. ამ კითხვებს ვსვამთ ხელისუფლების მისამართით. ამ საკითხს ვეღარ წყვეტს ნათია თურნავა, რომელიც გაიპარა შეხვედრიდან. მაშინ უნდა მოსულიყო უკვე მისი ზემდგომი, ანუ ბატონი ირაკლი, პრემიერმინისტრი, რომელიც ალბათ არის იმაზე მეტად გადაწყვეტილების მიმღები, ვიდრე ქალბატონი ნათია. ყოველ შემთხვევაში, ბატონი მერაბი ნამდვილად არ არის ეს პერსონა", — თქვა ვარლამ გოლეთიანმა.

მერაბ ლომინაძის თქმით კი, "არც მუქარაზე და არც სხვა რამეზე არ არის საუბარი". ენკას ახალი დირექტორის განცხადებით, კომპანია განაგრძობს წინამოსამზადებელ სამუშაოებს. ამასთან, დღეს მან ასევე თქვა, რომ ამ ეტაპზე მხოლოდ მოსამზადებელი სამუშაოებია დაწყებული და ძირითადი ობიექტების მშენებლობა, რომელთა მიმართაც არსებობს კითხვები, იქნება კაშხლის ტანი თუ სხვა, არ დაიწყება მანამ, სანამ არ მოხდება კვლევების ვერიფიკაცია.

აღსანიშნავია, რომ ადგილზე დილიდან მობილიზებული იყო პოლიცია, რამაც აქტივისტების უკმაყოფილება გამოიწვია. შინაგან საქმეთა სამინისტრო განმარტავს, რომ სხვადასხვა დანაყოფის თანამშრომლები ტერიტორიაზე უსაფრთხოებისა და მართლწესრიგის დაცვის მიზნით, ნამახვანჰესის წინამოსამზადებელი სამუშაო პროცესის განახლებასთან დაკავშირებით, რიონის ხეობაში დილიდან არიან მობილიზებულები.

უწყება მოუწოდა მოქალაქეებს, არ გასცდნენ გამოხატვის თავისუფლების კანონით დასაშვებ ფარგლებს, დაემორჩილონ პოლიციის მოთხოვნებს.

ასევე, შსს-მ დაადასტურა დღეს დილიდან გავრცელებული ინფორმაცია, რომ რიონის ხეობაში მოქალაქეთა გადაადგილება გარკვეულ მიმართულებებზე დროებით იზღუდება. უწყება ამტკიცებს, რომ ამის მიზეზი უსაფრთხოებაა და პოლიციის შესახებ საქართველოს კანონის 25-ე და 26-ე მუხლებზე მიუთითებს.

გარდა ამისა, შსს აცხადებს, რომ ადგილზე მობილიზებულია საპოლიციო ინფრასტრუქტურა, მათ შორის, სპეციალური სატრანსპორტო საშუალება, რომელიც რადიოკავშირის გამართულ მუშაობას უზრუნველყოფს. აქტივისტები კი აცხადებენ, რომ პირიქით, ამ ტექნიკის მიზანი სიგნალის ჩახშობაა.