ევროპარლამენტარი ვიოლა ფონ კრამონი ევროპარლამენტარების მიერ საქართველოსთვის ფინანსური დახმარების შეჩერების მოთხოვნაზე ამბობს, რომ საქართველოში მიმდინარე პოლიტიკურ კრიზისზე ეს წამყვანი ევროპარლამენტარების ნათელი განცხადებაა.

"ევროპარლამენტში ჩვენთვის, (საქართველოს მეგობრებისთვის), ძალიან იმედგამაცრუებელია იმის აღქმა, რომ პოლიტიკურ ელიტას ამ არეულობის დასრულება არ სურს. ქართველი ხალხი გამოსავალს რაც შეიძლება მალე იმსახურებს", — წერს ვიოლა ფონ კრამონი ტვიტერზე.

პოლიტიკური პარტიებისგან კომპრომისზე უარის თქმის შემდეგ, ევროპარლამენტარები საქართველოსთვის მაკროსაფინანსო დახმარების შეჩერებას მოითხოვენ. ისინი ევროპული საბჭოს პრეზიდენტის, შარლ მიშელის პირადი წარმომადგენლის, კრისტიან დანიელსონის მედიაციით გამართული მოლაპარაკებების წარუმატებლად დასრულებაზე მწუხარებას გამოთქვამენ და ამ შედეგში პასუხისმგებლობას როგორც მმართველ, ისე ოპოზიციურ პარტიებსაც აკისრებენ.