18 მარტს საკოორდინაციო საბჭოს სხდომის დასრულების შემდეგ ცნობილი გახდა, რომ კინოთეატრებს პირველი აპრილიდან მუშაობის განახლების შესაძლებლობა ეძლეოდათ. ცოტა ხნის წინ კი ქართული კინოთეატრების წარმომადგენლებმა დააზუსტეს, რომ კინოჩვენებები 8 აპრილიდან აღდგება.

"ჩვენთვის მაყურებლისა და ჩვენი თანამშრომლების უსაფრთხოებაა მთავარი, ამიტომ თითოეულ ახალ მითითებასა და რეგულაციას სრულყოფილად ვასრულებთ და გულდასმით ვემზადებით, რომ კინომოყვარულებმა ისევ უსაფრთხოდ იგრძნონ თავი და კვლავ ისიამოვნონ აქ გატარებული დროით", — აცხადებენ ისინი.

კინოსამყაროში მონატრებული სტუმრობისას მაყურებელს, ცხადია, პანდემიისგან გამომდინარე უსაფრთხოების დაცვის გარკვეული ნორმების გათვალისწინება მოუწევს: სავალდებულო იქნება პირბადის ტარება და ფიზიკური დისტანციის დაცვა; კომენდანტის საათის გამო ბოლო სეანსი დაახლოებით 6 საათზე დაიწყება; ყოველ ჩვენებამდე ჩატარდება ზედაპირების დეზინფექცია, მკაცრდება და იცვლება დასუფთავების ნორმები.

რაც ყველაზე მნიშვნელოვანია, კინოთეატრების ქსელი კავეა და კინოთეატრი ამირანი მსოფლიო პრემიერებს შესთავაზებს მაყურებელს, ამავდროულად კი ცოტა დაგვიანებული, თუმცა ბევრისთვის ნანატრი კინოსურათების ჩვენებებიც გაიმართება დიდ ეკრანზე.

აპრილში მაყურებელს შემდეგი ფილმების ხილვა შეეძლება დიდ ეკრანზე: გოძილა vs კონგი, მორტალ კომბატი, დისნეის ახალი ანიმაცია რაია და უკანასკნელი დრაკონი, ტომი და ჯერის კინოვერსია, მერაბ ნინიძისა და ბენედიქტ კამბერბეჩის საერთო ახალი ფილმი კურიერი, კრისტოფერ ნოლანის ტენეტი და წლევანდელი ოსკარის თითქმის ყველა ნომინანტი კინოსურათი.

და ეს მხოლოდ ნაწილია: დაგეგმილი ჩვენებების სრული აფიშა უახლოეს დღეებში გახდება ცნობილი და ბილეთების გაყიდვაც მალე დაიწყება.