ქართული ოცნების ერთ-ერთი ლიდერი, მამუკა მდინარაძე გიორგი რურუას "კრიმინალურ ავტორიტეტს" უწოდებს და აცხადებს, რომ ოპოზიცია მას "2 500 ლარად უწოდებს პოლიტპატიმარს".

"მე არ ვიცი, თვითონ ოპოზიციონერებს ეშინიათ, თუ ასეთი თავხედური დღის წესრიგი აქვთ, რომ კრიმინალურ ავტორიტეტზე საუბრობენ, რომ ის არის პოლიტპატიმარი. ჩვენ გვყავს ქვეყანაში კრიმინალური ავტორიტეტი, გიორგი რურუა, რომელიც ამჟამად ზის ციხეში და ამ კრიმინალურ ავტორიტეტს 2 500 ლარად უწოდებენ პოლიტპატიმარს, ეს არის მოცემულობა. ამ ადამიანმა ჩარიცხა ფორმალურად, რომ თითქოს რაღაც პოლიტიკასთანდ დაეფიქსირებინა თავისი კონტაქტი, 2 500 ლარი ნაციონალური მოძრაობის არხზე და ამ 2 500 ლარად უწოდებენ მას პოლიტპატიმარს, ეს არის მთავარი ამბავი, ეს ხომ ყველამ ვიცით. ერთმანეთს თუ ვერ უმხელენ პირადად ამ ადამიანის შიშით, ეს არ ვიცი", — განაცხადა მდინარაძემ.

გუშინ, 30 მარტს ქართული ოცნება და ოპოზიცია ისევ ვერ შეთანხმდნენ. მათ ევროპული საბჭოს პრეზიდენტის შარლ მიშელის წარმომადგენლის, კრისტიან დანიელსონის მიერ შეთავაზებულ დოკუმენტს ხელი არ მოაწერეს.

დანიელსონის მედიაციით მხარეებს შორის შეხვედრა 17:00 საათზე დაიწყო. ის საქართველოში მეორედ 27 მარტს ჩამოვიდა. 28 მარტს საქართველოში ევროკავშირისა და ამერიკის შეერთებული შტატების ელჩსა და არასამთავრობო სექტორის წარმომადგენლებს, ხოლო 29 მარტს პოლიტიკურ პარტიებს ინდივიდუალურ ფორმატში შეხვდა.

დანიელსონის პირველი ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

შვედი დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.

გაიგეთ მეტი:

რა ეწერა დოკუმენტში, რომელსაც მხარეებმა ხელი არ მოაწერეს