გირჩი — მეტი თავისუფლების ლიდერის, ზურაბ ჯაფარიძის განცხადებით, დღევანდელ შეხვედრაზე პროცესი ზუსტად ისე განვითარდა, როგორც წინა რაუნდზე და მომლაპარაკებლებმა ვერ შეძლეს ისეთი ტექსტის დადება, რომელიც ქართული ოცნებისთვის მისაღები იქნებოდა. მისი თქმით, ოპოზიციას 3 პუნქტზე პრობლემა არ ჰქონდა, მაშინ, როცა მმართველი პარტიისთვის არცერთი არ იყო მისაღები.

"პროცესი, პრინციპში, ზუსტად ისე განვითარდა, როგორც წინა მოლაპარაკებების რაუნდის დროს. მომლაპარაკებლებმა ვერ შეძლეს ისეთი ტექსტის დადება, რომელიც მისაღები იქნებოდა ქართული ოცნებისთვის. გასაგებია, რომ იქ იყო ორი პუნქტი, რომელიც პრობლემური იყო ოპოზიციისთვის, ეს არის ხელახალი არჩევნების და პოლიტპატიმრების თემა.

თუმცა მაგის გარდა იყო სამი პუნქტი, რომელიც არ იყო ოპოზიციისთვის პრინციპული და ჩვენ საჯაროდაც განვაცხადეთ, რომ თანახმა ვიყავით, მაგრამ იმ პუნქტებთან მიმართებაშიც კი, ქართული ოცნება არ იყო მზად, რომ ხელი მოეწერა და იმ პუნქტებზე მაინც დათანხმებულიყო. ჩვენ 5 პუნქტიდან 3 პუნქტზე მაინც ვიძახდით, რომ ამაზე პრობლემა არა გვაქვს, იმიტომ, რომ არ იყო ჩვენთვის კრიტიკულად მნიშვნელოვანი, ოცნებისთვის არცერთი პუნქტი არ იყო [მისაღები], არა", — თქვა მან.

ქართული ოცნება და ოპოზიცია ისევ ვერ შეთანხმდნენ. მათ ევროპული საბჭოს პრეზიდენტის შარლ მიშელის წარმომადგენლის, კრისტიან დანიელსონის მიერ შეთავაზებულ დოკუმენტს ხელი არ მოაწერეს.

დანიელსონის მედიაციით მხარეებს შორის შეხვედრა 17:00 საათზე დაიწყო. ის საქართველოში მეორედ 27 მარტს ჩამოვიდა. 28 მარტს საქართველოში ევროკავშირისა და ამერიკის შეერთებული შტატების ელჩსა და არასამთავრობო სექტორის წარმომადგენლებს, ხოლო 29 მარტს პოლიტიკურ პარტიებს ინდივიდუალურ ფორმატში შეხვდა.

დანიელსონის პირველი ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

შვედი დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.