განახლება: საბუკოს ინფორმაციით, სამწუხაროდ, ბექობის არწივი დაიღუპა.

არასამთავრობო ორგანიზაცია საბუკოს ინფორმაციით, ბრაკონიერმა გადაშენების პირას მყოფი ბექობის არწივი დაჭრა. არწივი სოფელ მაღაროსთან 29 მარტს იპოვეს და ორგანიზაციას დაუკავშირდნენ. მძიმე მდგომარეობის გამო ფრინველი თბილისშია გადმოყვანილი.

საბუკოს ვარაუდით, ფრინველი ჯერ 1 წლისაც არაა და ის საქართველოში თბილი ქვეყნიდან იყო დაბრუნებული. რენტგენის გადაღების შემდეგ, არწივს 7 ფინდიხი და არაერთი გამჭოლი ჭრილობა აღმოაჩნდა.

საბუკომ აღნიშნულ ტერიტორიაზე ბექობის არწივზე ბრაკონიერობის მეორე ფაქტი დააფიქსირა. ბექობის არწივი გადაშენების პირას მყოფი ფრინველია და მის კონსერვაციაზე ორგანიზაცია 2018 წლიდან ზრუნავს. აღსანიშნავია, რომ საბუკოს მიერ სატელიტური გადამცემით დანიშნული ბექობის არწივების 80%-ზე მეტი პირველ ან მეორე წელს დაიღუპა.

დაშავებული არწივის მდგომარეობის შესახებ ახალი ინფორმაცია ორგანიზაციას ჯერ არ გაუვრცელებია.