ბოლტის კურიერებმა შრომითი პირობების გაუმჯობესების მოთხოვნით აქცია გამართეს. აქციის ორგანიზატორების განცხადებით, კომპანიამ დაარღვია პირველი გაფიცვის დროს დადებული პირობა პრობლემების განხილვასთან დაკავშირებით და საბონუსე სისტემა გააუარესა შემდეგ კი, პროტესტის მონაწილეების სამსახურიდან გათავისუფლება და ახალი კურიერების მიღება დაიწყო.

"ჩვენი მოთხოვნებია, რომ გადაიხედოს საბონუსე სისტემა, ანაზღაურდეს რესტორნამდე მისვლის მანძილი, ასევე, ერთ-ერთი მთავარი მოთხოვნა, რაც წარმოიშვა ამ პროტესტის პროცესში არის ის, რომ ადამიანები, რომლებიც აქციის პირობებში კომპანიამ გაუშვა სამსახურიდან იმ არგუმენტით, რომ ვითომ ჩვენ სხვა კურიერებს ვაიძულეთ პროტესტში ჩართულიყვნენ. ეს აარის სრული აბსურდი, ჩვენ უბრალოდ ინფორმაციას ვავრცელებდით, რომ კომპანია ასე გვექცევა და მოდი, შემოგვიერთდი პროტესტში. ეს მხოლოდ მოწოდება იყო. კომპანიისგან პასუხი აღარ მოგვდის, გუშინ პოლიციის ძალით გადაგვიკეტეს ოფისი და პასუხი არ გაგვცეს, გუშინ ღამე კი ფეისბუქპოსტით გვიპასუხეს, რომლიდანაც კარგად გამოჩნდა კომპანიის პოლიტიკა", — აცხადებს On.ge-სთან აქციის ერთ-ერთი მონაწილე.

ფოტო: გვანცა სეთურიძე / On.ge

მისი თქმით, კომპანიამ უკვე 20-მდე კურიერი დაბლოკა, ანუ გაათავისუფლა სამსახურიდან, მიზეზად კი დაასახელეს ის, რომ ამ კურიერებმა სხვები აიძულეს პროტესტში ჩართულიყვნენ.

ფოტო: გვანცა სეთურიძე / On.ge

Bolt Food-მა 24 მარტს კურიერების პროტესტს ფეისბუქპოსტით უპასუხა და განაცხადა, რომ კურიერები დასაქმებული არ არიან შრომითი ხელშეკრულებით, ისინი საპარტნიორო ხელშეკრულების საფუძველზე მუშაობენ და თავად შეუძლიათ აირჩიონ როდის სურთ, ან სურთ თუ არა მუშაობა.

"იგივე ჯგუფის მხრიდან ადგილი ჰქონდა ორგანიზებულ აქტივობებს, რომლებმაც ხელი შეუშალა ჩვენი სერვისის და სხვა პარტნიორი კურიერების სამუშაო პროცესს. პასუხად, მათი ანგარიშები დაბლოკილი იქნა პლატფორმიდან. ნებისმიერი სახის ორგანიზებულ მცდელობას, რომელმაც შესაძლოა შეაფერხოს Bolt Food-ის, ან პარტნიორი რესტორნების ბიზნეს ოპერაციები, აუცილებლად მოჰყვება მკაცრი რეაგირება კომპანიის მხრიდან", — აცხადებს კომპანია.