ინფექციური საავადმყოფოს დირექტორისა და კლინიკური ჯგუფის ხელმძღვანელის, თენგიზ ცერცვაძის განცხადებით, თუ საზოგადოება ვაქცინასა და პირბადის ტარებაზე უარს იტყვის, საქართველოში მესამე ტალღა მალე დაიწყება.

"მესამე ტალღა საქართველოში დაიწყება მალე. სამწუხაროდ, ახლო მომავალში, თუ უარს ვიტყვით ვაქცინაზე და პირბადეების ტარებაზე", — განაცხადა ცერცვაძემ.

მან, ასევე, თქვა, რომ საქართველოში კორონავირუსის საწინააღმდეგო ვაქცინაციის მიმართ უპრეცედენტო პასიურობაა. მისი თქმით, მეორე პრობლემა საზოგადოების მიერ რეგულაციების არდაცვაა.

NDI-ს კვლევის თანახმად, გამოკითხულთა 53 პროცენტი კორონავირუსის წინააღმდეგ ვაქცინის გაკეთებას არ აპირებს. ამასთან, აცრის გაკეთებაზე თანახმაა მხოლოდ 35 პროცენტი, ხოლო 12-მა პროცენტმა არ იცის.

საქართველოში მედპერსონალის ვაქცინაცია AstraZeneca-ს ვაქცინით 15 მარტიდან დაიწყო. ჯანდაცვის მინისტრის, ეკატერინე ტიკარაძის განცხადებით, ვაქცინაციის პროცესში 65 წელს ზევით მოქალაქეებიც 25 მარტიდან ჩაერთვებიან.

მინისტრის მოადგილე, თამარ გაბუნიამ კი არ გამორცხავს, რომ ვაქცინაციის პროცესში ჩართვის შესაძლებლობა ახალ ჯგუფს — 55 წლის ზევით ასაკის მოქალაქეებსაც მისცენ.