პარტია მოქალაქეების ერთ-ერთი ლიდერის, ალეკო ელისაშვილის განცხადებით, ბანკი პენსიონერებს "აუხსნელად დიდ", 36%-ს ახდევინებს სესხის წინასწარ გამოტანაში. მისი თქმით, მათ ამ საკითხთან დაკავშირებით კითხვები აქვთ, ამიტომ მიმართეს საფინანსო-საბიუჯეტი კომიტეტს, რომ დაინიშნოს სხდომა და ყველა დაინტერესებულმა პირმა შესაბამისი კითხვები დასვას. ამის შესახებ მან სპეციალურ ბრიფინგზე ისაუბრა.

"ყველაზე მნიშვნელოვანია ხალხის რეალურ პრობლემებზე ვსაუბრობდეთ. რეალური პრობლემა ჰკითხეთ ნებისმიერ პენსიონერს, ეს არის საბანკო პროცენტი, რომელიც ლიბერთი ბანკს აქვს პენსიონერებისთვის დაწესებული. ყველამ ვიცით, რომ თითქმის 800 ათასი პენსიონერია და აქედან 50%-ს, თითქმის ნახევარს აქვს წინასწარ გამოტანილი, სულ მცირე, რამდენიმე თვის ან ერთი წლის პენსია და საქართველოში ყველაზე დაუცველ ადამიანებს ბანკი ახდევინებს არანორმალურ, აუხსნელად დიდ, 36%-ს სესხის წინასწარ გამოტანაში. შესაბამისად, ბანკის დავალიანება აქვს თითქმის ნახევარს პენსიონერების.

ჩვენ მიგვაჩნია, რომ ეს არის ერთ-ერთი ყველაზე დიდი პრობლემა, ამიტომაც ჩვენ, პარტია მოქალაქეების წარმომადგენლებმა მივმართეთ საფინანსო-საბიუჯეტო კომიტეტს და ვითხოვთ, რომ ამ აუხსნელად დიდ საბანკო პროცენტთან დაკავშირებით დაინიშნოს საგანგებო მოსმენა, სადაც მოვლენ პასუხისმგებელი პირები, ეროვნული ბანკის პრეზიდენტი, ჯანდაცვის სამინისტროს სოციალური სამსახურის ხელმძღვანელობა და ასევე, ხელმძღვანელები ლიბერთი ბანკის", — თქვა მან.

მისი განცხადებით, მათ უამრავი კითხვა აქვთ, რადგან მიაჩნიათ, რომ ეს არის "აბსოლუტურად უსამართლოდ გაბერილი" პროცენტი. ელისაშვილის თქმით, ამაზე პასუხისმგებელია ეროვნული ბანკიც და ჯანდაცვის სამინისტროც, ვინაიდან, ლიბერთი კერძო ბანკია და მასთან სახელმწიფოს "ყოველგვარი კონკურენციის" გარეშე აქვს ხელშეკრულება გაფორმებული. დეპუტატი აღნიშნავს, რომ იმ შემთხვევაში თუ ტენდერი გამოცხადდებოდა, ჯანსაღი კონკურენცია იქნებოდა ან რამდენიმე ბანკი მიიღებდა პენსიების განკარგვის უფლებას, პროცენტი გაცილებით დაბალი იქნებოდა.