ოშპიტელი-გუდამაყრის გზაზე კლდოვანი ფერდობის ჩამოშლის შედეგად 22 სოფელი ჩაიკეტა. მცხეთა-მთიანეთის მხარის სახელმწიფო რწმუნებულის, დავით ნოზაძის თქმით, მოსახლეობა შემთხვევის ადგილიდან 100 მეტრში იმყოფება, მაგრამ, მისი თქმით, საფრთხე არცერთ მათგანს არ შექმნია.

"მთის კლდოვანი მასა ჩამოიშალა, რამაც საავტომობილო გზის ჩაკეტვა გამოიწვია. მოსახლეობა იმყოფება 100 მეტრში, მაგრამ საბედნიეროდ, არცერთ მათგანს საფრთხე არ შექმნია. ადგილზე ყველა სამსახური და უწყებაა მობილიზებული... დაემთხვა ისე რომ წვიმებმა და უხვმა ნალექმა ხელი შეუწყო მეწყრის ჩამოწოლას. რაიმე მექანიკური სახით გამოწვეული არ არის, კლდოვანი მასის ჩამოშლა ბუნებრივად მოხდა", — განაცხადა დავით ნოზაძემ.

მისივე თქმით, ხვალ, 24 მარტს შესაბამისი დარგის ექსპერტებს ელოდებიან, რომლებიც არსებულ ვითარებას ადგილზე შეისწავლიან და გაწმენდითი სამუშაოების დაწყება მხოლოდ მათი თანხმობის შემთხვევაში მოხდება.