მითების დეტექტორმა გაარკვია, რომ ფოტო, რომლითაც თავდაცვის მინისტრის მოადგილემ მესაზღვრეებს პროფესიული დღე მიულოცა, ოკუპირებულ ცხინვალშია გადაღებული და მასზე რუსი სამხედროა აღბეჭდილი.

აღნიშნული ფოტოს გამოქვეყნების შესახებ ინფორმაცია 21 მარტს ტელეკომპანია ფორმულამ გაავრცელა, რომლის ცნობითვე, მინისტრის მოადგილემ ფოტო მას შემდეგ წაშალა, რაც კომენტარში დაუწერეს, რომ მასზე რუსი მესაზღვრე იყო ასახული. მოგვიანებით კი, დავით სუჯაშვილმა საზოგადოებას ბოდიში მოუხადა და მომხდარი გვერდის ადმინისტრატორის გაუფრთხილებლობით ახსნა.

Yandex.ru-ს საძიებო სისტემით აღნიშნული ფოტოს ყველაზე ადრე გამოქვეყნებული ვერსია 2019 წლის წლის 28 მაისით თარიღდება. მასალაში სათაურით "ФСБ-ს სასაზღვრო ოფისი სამხრეთ ოსეთში: ხალხს შეუძლია მშვიდად იძინოს" (Погрануправление ФСБ в Южной Осетии: народ может спать спокойно) აღნიშნული ფოტო შემდეგი აღწერით გვხვდება: "რუსი მესაზღვრეები სამხრეთ ოსეთის საზღვრების სადარაჯოზე" (Российские пограничники на страже границ Южной Осетии).

ფოტო: Sputnik

ამავე დღეს ამ ფოტოთი გამოქვეყნდა მეორე მასალა, სათაურით "ბიბილოვი მესაზღვრეებს ულოცავს: ვაჟკაცობის, პატივისა და სიმამაცის საუკეთესო მაგალითი" (Бибилов в поздравлении пограничникам: высокий пример доблести, чести и отваги).

ფოტო: Sputnik

აღნიშნული ფოტო სპუტნიკ ოსეთის გვერდზე 2019 წლის 31 ოქტომბრით დათარიღებულ სტატიასთან ერთადაც გვხვდება, სათაურით: "სამხრეთ ოსეთისა და რუსეთის ერთობლივმა კომისიამ კვლავ განიხილა საზღვრების დემარკაციის საკითხი" (Совместная комиссия Южной Осетии и России вновь обсудила демаркацию границы).

ფოტო: Sputnik

2019 წლის 30 აგვისტოთი დათარიღებული ფოტო Sputnik-აფხაზეთის საიტზეც გვხვდება და ის ისევ სამაჩაბლოსთან მიმართებითაა გამოყენებული, კერძოდ, თან ახლავს ინფორმაციას, სათაურით "აშშ მოუწოდებს რუსეთს, სამხრეთ ოსეთსა და საქართველოს ესკალაციის თავიდან არიდებაში დაეხმაროს" (США призвали Россию помочь предотвратить эскалацию между Южной Осетией и Грузией)

ფოტო: Sputnik