საქართველოს პრეზიდენტი, სალომე ზურაბიშვილი აზერბაიჯანულ თემს და საზოგადოებას ნოვრუზ ბაირამის დღესასწაულს ულოცავს. მისი თქმით, ამ დღესასწაულის აღნიშვნას საქართველოში მრავალსაუკუნოვანი ისტორია აქვს, რაც ქვეყნის კულტურისა და ტრადიციების მრავალფეროვნების მაგალითია.

"საქართველოში ნოვრუზობის დღესასწაულის აღნიშვნას მრავალსაუკუნოვანი ისტორია აქვს. ეს არის საქართველოს კულტურისა და ტრადიციების მრავალფეროვნების ნათელი მაგალითი [...]

ვულოცავ საქართველოს ეთნიკურად აზერბაიჯანელ მოქალაქეებს, ჩვენს ყველა მოქალაქეს, რომელიც ნოვრუზ ბაირამს ზეიმობს", — ვკითხულობთ პრეზიდენტის ადმინისტრაციის მიერ გავრცელებულ განცხადებაში.

პრეზიდენტი აღნიშნავს, რომ პანდემიის გამო დღესასწაულის ერთად აღნიშვნის შესაძლებლობა არ გვაქვს.

"პანდემიის გამო, სამწუხაროდ, წელსაც არ გვეძლევა ამ უძველესი დღესასწაულის ერთად აღნიშვნის შესაძლებლობა. მჯერა, რომ ერთიანი ძალისხმევით პანდემია დამარცხდება და მომავალში ნოვრუზობის ლამაზი ზეიმის ტრადიციულად აღნიშვნა ყოველთვის გაალამაზებს საქართველოს გაზაფხულს", — წერს სალომე ზურაბიშვილი.

ნოვრუზ ბაირამის დღესასწაულთან დაკავშირებით, აზერბაიჯანულმა თემმა პრემიერმინისტრს ე.წ. კომენდანტის საათის ერთი დღით გაუქმების თხოვნით მიმართა, თუმცა მთავრობამ ეს თხოვნა არ დააკმაყოფილა.

• დისკრიმინაციული კომენდანტი: როცა შობა და ფეხბურთი გამონაკლისია, ნოვრუზ ბაირამი — არა

"კულტურულ რელიგიურ და სხვა მსგავს დღესასწაულებზე ხალხმრავლობიდან გამომდინარე და ვირუსის გავრცელების მომატებული რისკის საფრთხის გამო, განსაკუთრებით იმ დროს, როცა ეს შეზღუდვები უკვე მოხსნილია, მსგავს დღესასწაულთან დაკავშირებით შეზღუდვების შემსუბუქება მიზანშეწონილი არაა", — განაცხადა მთავრობის ადმინისტრციის უფროსმა, ილია დარჩიაშვილმა.

მსგავსი უარი თვეების წინ მიიღეს იმ რელიგიურმა კონფესიებმა, რომლებიც შობას 25 დეკემბერს აღნიშნავენ. ამჯერადაც და მაშინაც მთავრობამ მიზეზად კორონავირუსის გავრცელების რისკები დაასახელა.

ეს იმ ფონზე, როცა 6-7 იანვრის, მართლმადიდებელი ქრისტიანების შობის ღამეს, მთელი ქვეყნის მასშტაბით შეზღუდვა მოიხსნა. იმ პერიოდში კორონავირუსის ახალი შემთხვევების ყოველდღიური სტატისტიკა ბევრად მაღალი იყო და შეზღუდვებიც ბევრად უფრო მკაცრი.

აღსანიშნავია, რომ მთავრობამ გამონაკლისი დაუშვა არამხოლოდ დომინანტური რელიგიური ჯგუფისთვის, არამედ ფეხბურთის გულშემატკივრებისთვისაც — 28 მარტს საქართველო-ესპანეთის საფეხბურთო მატჩზე დამსწრეებს, რომლებსაც ბილეთი ექნებათ, ე.წ. კომენდანტის საათი არ შეეხებათ.

ნოვრუზ ბაირამის დღესასწაულისთვის ე.წ. კომენდანტის საათის დროებით მოხსნას ითხოვს საქართველოს სახალხო დამცველი და მასთან არსებული ეროვნულ უმცირესობათა საბჭოც.

21 მარტს საქართველოს აზერბაიჯანული თემი ნოვრუზს აღნიშნავს. ნოვრუზის რიტუალების ძირითადი ნაწილი კოცონის დანთება, ბაირამის მილოცვა, ბაირამის სუფრაზე დასწრება, ბავშვების მიერ ტკბილეულისთვის მეზობლების კართან ქუდის დაგდება, პოზიტიური ამბების გაზიარება და მოსმენაა. აზერბაიჯანული თემის განცხადებით, ეს ყველაფერი საღამოს საათებში სრულდება, ხოლო 21:00 საათისთვის დაწესებული გადაადგილების თავისუფლების შეზღუდვა აღნიშნული რიტუალების სრულფასოვნად ჩატარებაში ხელს უშლით.