მოქალაქეების ჯგუფი, რომლებმაც 6 მარტს თავისუფლების მოედანზეკომენდანტის საათის გასაპროტესტებლად აქცია გამართეს, ეჭვს გამოთქვამს იმასთან დაკავშირებით, რომ კომენდანტის საათი საქართველოში ეპიდემიოლოგიური მოტივით არ გამოიყენება და ხელისუფლება ამ რეგულაციით ადამიანების უფლებებს ლახავს.

"საქართველო არის ევროპის რეგიონის ერთადერთი ქვეყანა, სადაც მოსახლეობისათვის უცნობია, თუ რა ეპიდემიოლოგიური ლოგიკით იქნა მიღებული გადაწყვეტილება კომენდანტის საათის შემოღების შესახებ და ასევე უცნობია, თუ როდის მოიხსნება ის. შესაბამისად, თვეებით გაგრძელებულმა კომენდანტის საათმა გააჩინა ეჭვი, რომ აღნიშნული შეზღუდვა საქართველოს პრაქტიკაში არ გამოიყენება როგორც ეპიდემიოლოგიური შეზღუდვა. აღნიშნულ ეჭვს ამყარებს ის ფაქტიც, რომ ქვეყანაში დღიური ინფიცირების შემთხვევა არ სცდება 1.52 %-ს , მოხსნილია პრაქტიკულად ყველა ის შეზღუდვა, რომელიც 28 ნოემბრიდან მოქმედებდა", — აცხადებენ ისინი.

მოქალაქეების ჯგუფის თქმით, ეს შეზღუდვა ამავდროულად არის უკანონო.

"კომენდანტის საათის ეფექტები არსებით ზიანს აყენებს სხვა კონსტიტუციური უფლებებით დაცულ სფეროებს — მაგალითად, გამოხატვის თავისუფლებას, პროფესიული საქმიანობის განხორციელებას, ადამიანის ფიზიკურ თავისუფლებას, პირად ცხოვრებას. იშვიათი გამონაკლისების გარდა, ის ინტენსიურად ზღუდავს თითქმის ყველა კონსტიტუციურ უფლებას", — ამბობენ ისინი.

მოქალაქეების აზრით, ამგვარი დამოკიდებულება იმ პირობებში, როდესაც ყველა სხვა შეზღუდვა შემსუბუქებული ან მოხსნილია, ცხადად მიუთითებს იმაზე, რომ აღმასრულებელი ხელისუფლება არ, ან ვერ იაზრებს კომენდანტის საათიდან გამომდინარე უფლების შეზღუდვის სიმწვავეს და მას არ იყენებს, როგორც უკიდურესად აუცილებელ ღონისძიებას.

"ეჭვი იმასთან დაკავშირებით, რომ კომენდანტის საათი საქართველოში არ გამოიყენება ეპიდემიოლოგიური მოტივით, ძლიერდება მაშინ, როდესაც ხელისუფლებასთან დაახლოებული მედია რესურსები კოორდინირებულად და ერთხმად აშუქებენ ევროპაში არსებულ შეზღუდვებს მხოლოდ იმ კუთხით, რა კუთხითაც შეიძლება მოსახლეობაში გააჩინონ აღქმა, რომ დემოკრატიის მაღალი კულტურის მქონე ქვეყნებშიც ზუსტად ის შეზღუდვები გამოიყენება, რაც საქართველოში", — ამბობენ მოქალაქეები.

მათივე აზრით, ეჭვს აჩენს ის ფაქტიც, რომ არც ერთხელ, არც ერთი გადაწყვეტილების მიღების პროცესი არ ყოფილა გამჭვირვალე.

"საქართველო ახალგაზრდა დემოკრატიაა, სადაც ინსტიტუტები ჯერ კიდევ არ არის დამოუკიდებელი, ხოლო სასამართლო მრავალი საერთაშორისო შეფასების თანახმად, კვლავ პოლიტიკური გავლენის ქვეშ არის. მსოფლიო პრაქტიკამაც აჩვენა, რომ იქ, სადაც დემოკრატია არ არის ძლიერი, ხელისუფლებებს მუდმივად აქვთ ცდუნება, რომ შეზღუდონ ადამიანის უფლებები. ჩვენი აზრით, სწორედ ასეთ ცდუნებას არის აყოლილი საქართველოს ხელისუფლება და ამას ეწირება ასობით ათასი ჯანმრთელი ადამიანის უფლებების უხეში დარღვევა", — ამბობენ განცხადების ავტორები.

დაავადებათა კონტროლის ეროვნული ცენტრის დირექტორმა, ამირან გამყრელიძემ 15 მარტს განაცხადა, რომ თუ ეპიდსიტუაცია ისეთი სტაბილური იქნება, როგორც ახლაა, მაშინ კომენდანტის საათის მოხსნის საკითხს შემდეგ ეტაპზე განიხილავენ.