ინცექციური საავადმყოფოს დირექტორი, თენგიზ ცერცვაძე იმედოვნებს, რომ მოსახლეობის უმრავლესობა საფრთხის ქვეშ არ დააყენებს საკუთარ ჯანმრთელობას და არ წამოეგება ანტივაქსერულ პროვოკაციებს.

"მე იმედი მაქვს, რომ ხალხის დიდი უმეტესობა, მოსახლეობის, არ წამოეგება ამ ანტივაქსერულ პროვოკაციას, არ დააყენებს საფრთხის ქვეშ საკუთარ ჯანმრთელობას [...] ვინც თავს იკავებს ვაქცინის გაკეთებისგან, ის დარტყმის ქვეშ აყენებს ქვეყნის ეკონომიკას, არა მარტო ჯანმრთელობას", — აცხადებს ცერცვაძე.

კორონავირუსის საწინააღმდეგო ვაქცინაცია საქართველოში გუშინ, 15 მარტს დაიწყო. დაავადებათა კონტროლის ეროვნული ცენტრის ინფორმაციით, პირველივე დღეს AstraZeneca-ს ვაქცინა 668 ადამიანმა გაიკეთა. ამასთან, 15 მარტის 20:00 საათის მონაცემებით, ვაქცინაციისთვის 4 202 მედპერსონალი დარეგისტრირდა .

საქართველოში AstraZeneca-ს ვაქცინის 43 200 დოზა შაბათს, 13 მარტს შემოვიდა და ის განკუთვნილია სამედიცინო პერსონალისთვის. შემდეგი ეტაპია ხანგრძლივი მოვლის დაწესებულებების ბენეფიციარებისა და პერსონალის აცრა, ამის მერე კი, ვაქცინას 75 წელზე მეტი ასაკის ადამიანებს გაუკეთებენ.

ვაქცინაციისთვის ქვეყანაში შერჩეულია 82 დაწესებულება, თუმცა პირველ ეტაპზე პროცესი 29 ცენტრში დაიწყება და კვირის განმავლობაში ახალი ამცრელი პუნქტები დაემატება.

ჯანდაცვის მინისტრმა, ეკატერინე ტიკარაძემ 11 მარტს განაცხადა, რომ საწყის ეტაპზე აიცრება 43 200 ადამიანი და რადგან ეს ვაქცინა 2 დოზით კეთდება, მეორე დოზას აცრილები გაიკეთებენ მაშინ, როცა დამატებითიც შემოვა. მისი თქმით, იციან დროის მონაკვეთი, როცა გარანტირებულად მიიღებენ მეორე დოზებს და აქვთ დასტური, რომ შემოტანა გარანტირებულად მოესწრება.

გაიგეთ მეტი: