დანიასა და ისლანდიაში საქართველოს ყოფილი ელჩი, გიგი გიგიაძე მუშაობას ეკონომიკური პოლიტიკის კვლევის ცენტრში (EPRC) აგრძელებს.

EPRC-ში გადასვლის შესახებ გიგიაძემ ფეისბუქზე დაპოსტა. მსგავსი შინაარსის ინფორმაცია ორგანიზაციის აღმასრულებელმა დირექტორმა, ნინო ევგენიძემ სოციალურ ქსელში დაპოსტა.

გასული წლის ოქტომბერში, ჯერ კიდევ მოქმედმა ელჩმა კარტოგრაფების საქმეზე დაკავებულ ივერი მელაშვილის ბრალს აბსურდული უწოდა. მიმდინარე წლის 20 იანვარს კი გაირკვა, რომ გიგიაძემ დიპლომატიური მისია დაასრულა და საქართველოში ბრუნდება. ტელეკომპანია ფორმულას ინფორმაციით, გიგიაძე რეზერვში გადაჰყავთ, რაც სწორედ მელაშვილის მიმართ გაკეთებულ მის განცხადებას უკავშირდება. თუმცა საგარეო საქმეთა სამინისტროში ანიშნავენ, რომ როტაციის პრინციპის შესაბამისად, როდესაც ელჩი ასრულებს დიპლომატიურ მისიას უცხო ქვეყანაში, ბრუნდება დედაქალაქში.

აღსანიშნავია ისიც, რომ ელჩის მიერ კარტოგრაფების საქმეზე გაკეთებული განცხადების შემდეგ, საგარეო საქმეთა მინისტრმა, დავით ზალკალიანმა თქვა, რომ გაუკვირდა გიგიაძის "ემოციური დამოკიდებულება კოლეგის მიმართ".