ქართული ოცნების დეპუტატის, სოზარ სუბარის განცხადებით, თბილისის მერი, კახა კალაძე "როგორი ლეგენდაც იყო ფეხბურთში", ისეთივე კვალს დატოვებს თბილისის მერადაც. ამის შესახებ მან ტელეკომპანია იმედის ეთერში ისაუბრა.

"მერობის კანდიდატებზე არანაირ განცხადებას, ჯერ-ჯერობით, არ ვაკეთებთ. როცა დასახელების დროს დადგება, ყველა გაიგებს. წინასწარ არ ვიტყვით ამას, ბუნებრივია. მაგრამ კახა კალაძესთან დაკავშირებით ნებისმიერი სპეკულაცია მართლა სპეკულაციაა და თან სრულიად უადგილო. იმიტომ, რომ კახა კალაძე იყო, არის და იქნება ჩვენი გუნდის წევრი, ძალიან ერთგული, მტკიცე წევრი [...] როგორიც ლეგენდა იყო ფეხბურთში, დარწმუნებული ვარ, ისეთივე კვალს დატოვებს, როგორც თბილისის მერი, იმედია მომავალშიც", — თქვა მან.

ბოლო რამდენიმე დღეა ვრცელდება ინფორმაცია კახა კალაძის წასვლის შესახებ, კერძოდ, საუბარია, რომ კალაძე თბილისის მერობის კანდიდატურაზე საკუთარ თავს აღარ დააყენებს. ამას არ ადასტურებენ ქართული ოცნების წევრები.