მარტვილის ეპარქიაში ერთ-ერთი სასულიერო პირი მთავარი არხის ჟურნალისტსა და ოპერატორს ფიზიკურად შეეხო.

გავრცელებულ კადრებში ჩანს, რომ ოთახში, რომელიც ბევრი სასულიერო პირი დგას ოპერატორი იღებს და ჟურნალისტი შესვლას ცდილობს. ჟურნალისტს ხელზე ქაჩავენ და შესვლის საშუალებას არ აძლევენ. ამ დროს ერთ-ერთ სასულიერო პირი ოპერატორს ხელს უშლის გადაღებაში და კამერას ხელს კრავს, რის შემდეგაც ჟურნალისტს ხელებში ახტება და მიკროფონს ართმევს.

კადრში ისმის ოთახში მყოფი სხვა სასულიერო პირების ფრაზები: "პროვოკაციაა" და პოლიციას ეძახიან. ამ დროს ისინი ცდილობენ გარეთ გაუშვან პირი, რომელიც ვიდეოს იღებს და ეუბნებიან, რომ ამაზე "კურთხევაა მეუფის".

მარტვილის ეპარქიაში დღის განმავლობაში ხმაური იყო და საპროტესტო აქცია მიმდინარეობდა. მრევლი და სასულიერო პირების ნაწილი აპროტესტებდა ჭყონდიდისა და მარტვილის მიტროპოლიტი სტეფანეს გადაწყვეტილებას 2 სასულიერო პირისთვის მღვდელმსახურების შეჩერების შესახებ.

გავრცელდა კადრები, რომელშიც ჩანს, რომ დღეს ეპარქიაში მეორე სართულიდან 10-მდე ადამიანი გადავარდა. არიან დაშავებულები.

ვიდეოში ჩანს, რამდენიმე ადამიანი, მათ შორის ჟურნალისტები და ოპერატორები მეორე სართულის აივანზე იყვნენ. ვიდეოში ისმის ხმაური და კარის გაღების მოწოდება, ჩანს, რომ კარი იხსნება და აივანზე მყოფ ადამიანებს ხელს კრავენ, რის შემდეგაც მოაჯირი იმსხვრევა და ისინი ძირს ვარდებიან.