ევროპული საქართველოს ერთ-ერთი ლიდერის, გიგი უგულავას განცხადებით, ის საქართველოს ყოფილი პრეზიდენტის პათოსს პლებისციტთან დაკავშირებით არ იზიარებს. უგულავას თქმით, პლებისციტის ივანიშვილის პროექტად გამოცხადება, აბსოლუტურად მიუღებელია.

"მე არ ვიზიარებ მიხეილ სააკაშვილის პათოსს. ვთვლი, რომ ვიდრე მოლაპარაკებები არ დაწყებულა, მანამდე დამუნათება და მით უმეტეს, პლებისციტის იდეის ივანიშვილის პროექტად გამოცხადება, აბსოლუტურად მიუღებელია, რადგან პლებისციტს ბევრი პლიუსები აქვს. მაგალითად, ხვალ რომ რიგგარეშე არჩევნები ჩატარდეს, რიგგარეშე არჩევნები კანონის მიხედვით ჩატარდება 120/30-ზე პრინციპით, ანუ ისევ 30 მაჟორიტარი და თუ რამე არის ივანიშვილის, მე მინდა ბატონ მიხეილს შევახსენო ეს სწორედ 30 მაჟორიტარია", — განაცხადა უგულავამ მთავარ არხთან.

სააკაშვილმა 4 მარტს განაცხადა, რომ რიგგარეშე არჩევნებთან დაკავშირებით პლებისციტის მოდელს ოპოზიცია არ უნდა დათანმხდეს.

სტრატეგია აღმაშენებლის ერთ-ერთი ლიდერის, გიორგი ვაშაძის თქმით, ევროპული საბჭოს პრეზიდენტის შარლ მიშელის მხრიდან შეხვედრაზე თხოვნა იყო, რომ გარკვეულწილად კომპრომისულები ყოფილიყვნენ, რაზეც ოპოზიციის წარმომადგენლებმა განაცხადეს, რომ კომპრომისი იქნება, თუ ისინი რიგგარეშე არჩევნების მიმართ პლებისციტზე წავლენ.