ტრანსპორტის საქალაქო სამსახურის უფროსი, მამუკა მუმლაძე სამსახურის ოფისიდან, რომელიც მიცკევიჩის ქუჩაზე მდებარეობს, სააკაძეზე, მერიაში ველოსიპედით მივიდა.

ტრანსპორტის სამსახურის უფროსი ფიქრობს, რომ მან სამსახურში ველოდიპედით მისვლის ტრადიციას ჩაუყარა საფუძველი და მისივე განცხადებით, ამიერიდან ხშირად გამოიყენებს ამ ტრანსპორტს.

"დღეს ზამთარში სამსახურში ველოსიპედით მისვლის საერთაშორისო დღეა. დარწმუნებული ვარ, მალე მოვა ის დრო, როცა თბილისში სამსახურში მიმავალი ველოსიპედისტი ჩვეული მოვლენა იქნება".

აქტივისტებმა არაერთხელ მოითხოვეს თბილისში ველოტრასების მოწყობა, თუმცა, ჯერჯერობით ველომოყვარულებს ისევ სამანქანო გზებზე, ან ტროტუარებზე უწევთ ველოსიპედებით გადაადგილება, სადაც ქვეითებთან ერთად, ავტომობილები ამ დრომდე უპრობლემოდ გადაადგილდებიან. თბილისის მერიის დაპირებით, 2017 წლიდან ველო ინფრასტურქტურის მოწყობა დაიწყება. ველო ტრასებისა და ველო პარკინგების მოწყობის პროექტი ორგანიზაციას პარტნიორობა საგზაო უსაფრთხოებისთვის ეკუთვნის.

გარდა ამისა, თბილისის ქუჩებში მოუგვარებელია ტროტუარების პრობლემა. დავით ნარმანია 2016 წლის ივნისში აცხადებდა, რომ მერია ტროტუარზე პარკირებას, ალტერნატივის გარეშე, იმავე წლის სექტემბრიდან აკრძალავდა.