NCDC-ის დირექტორის მოადგილის, პაატა იმნაძის განცხადებით, ისეთ სიტუაციაში არიან, რომ Covax პლატფორმას ვერ უჩივლებენ. "ოღონდ რამე მოგვცენ", თქვა იმნაძემ პალიტრანიუსის ეთერში.

"დაახლოებით ის რომ ვთქვა — "მე ქვევითა ვარ, შენ ზევით, როგორ აგიმღვრევ წყალსაო". ვის უნდა ვუჩივლოთ? ოღონდ რამე მოგვცენ, აი, ასეთ სიტუაციაში ვართ", — თქვა მან.

1-ელ მარტს ჯანდაცვის მინისტრმა, ეკატერინე ტიკარაძემ განაცხადა, რომ არ არის გამორიცხული, საქართველომ Covax პლატფორმას უჩივლოს, ვინაიდან რეპუტაციულ რისკებზეცაა საუბარი. ასე უპასუხა მან Covax-ს განმარტებას იმაზე, თუ რატომ ვერ მიიღო საქართველომ ვაქცინა. Covax-ის ცნობით, თებერვლის ბოლოს ნაადრევი გზავნილები იმ ქვეყნებში განხორციელდა, რომლებმაც კრიტერიუმები უკვე დააკმაყოფილეს.