ოპოზიციის ლიდერების განცხადებით, დაგეგმილი საპროტესტო აქციები გაიმართება. ევროპული საბჭოს პრეზიდენტთან და საქართველოს პრემიერმინისტრთან შეხვედრის შემდეგ მათ განაცხადეს, რომ პიკეტირებების გეგმა ძალაში რჩება.

"ჩვენ პიკეტირებას და პროტესტს ვაგრძელებთ იმიტომ, რომ ეს არის ცალსახა განუყრელი ნაწილი იმისთვის, რომ ჩვენ შედეგზე გავიდეთ. ვერ გავაჩერებთ ვერცერთ შემთხვევაში ამ პროცესს", — განუცხადა შეხვედრის შემდეგ სტრატეგია აღმაშენებლის ლიდერმა, გიორგი ვაშაძემ.

ევროპული საქართველოს ლიდერის, გიგა ბოკერიას განცხადებით, ეს იქნება "ცივილიზებული პიკეტი", როგორც თავიდანვე იყო დაგეგმილი.

"მშვიდობიანი აქციები, რა თქმა უნდა, უნდა გაგრძელდეს, სანამ კრიზისი არ განიმუხტება და ჩვენ იქამდეც ეს პოზიცია გვქონდა, რომ ეს არის მხოლოდ მშვიდობიანი აქციები და ცივილიზებული პიკეტირება, არა ბლოკირება. თავიდანვე ასე იყო, არა დღევანდელი შეხვედრის შემდეგ", — განაცხადა გიგა ბოკერიამ ფორმულას ეთერში.

26 თებერვალს გამართულ აქციაზე ხატია დეკანოიძემ განაცხადა, რომ 2 მარტს პარლამენტის შენობის, ხოლო 5 მარტს მთავრობის ადმინისტრაციის შენობის პიკეტირება იგეგმება.

ოპოზიციის მიერ წარდგენილი გეგმის მიხედვით, 9 მარტს აქცია შინაგან საქმეთა სამინისტროსთან იგეგმება, 11 მარტს სასამართლოსთან, 13 მარტს კი პარლამენტთან.