ევროპული საქართველოს ერთ-ერთი ლიდერის, გიგი უგულავას განცხადებით, გამომდინარე იქედან, ჯერ არ იციან, აქციაზე რამდენი ადამიანი დარჩება, სავალი გზიდან კარვის გადატანა გადაწყვიტეს.

"წეღან შეატყვეთ, რომ აზრთა სხვადასხვაობა გვქონდა ძალიან კონკრეტულ საკითხზე, მაგრამ ეს მოგვარებულია, იმიტომ, რომ მას შემდეგ, რაც სავალი გზა იქნება ათვისებული მთლიანად, შევსებული, თუ ობიექტურად არის შევსებული და მეტი ხალხია, ვისაც დარჩენა უნდა, მერე, რა თქმა უნდა, ვიფიქრებთ აქეთ გადმოსვლაზე. ამ ეტაპზე, ვინაიდან ჯერ ზუსტად არ ვიცით, რამდენი ადამიანი რჩება და რამდენი არა, ახლა მივიღეთ გადაწყვეტილება, რომ ეს კარავი იქეთკენ გადავა", — თქვა მან.

დღეს ნიკა მელიას მხარდასაჭერ აქციაზე სამოქალაქო აქტივისტებმა და ოპოზიციის წარმომადგენლებმა კარავი რუსთაველის გამზირზე, სავალ გზაზე გაშალეს. როგორც On.ge-ს ერთ-ერთმა აქტივისტმა, ალიკა კუპრავამ განუცხადა, პოლიციამ ისინი გააფრთხილა, რომ გზა არ გადაეკეტათ, ვინაიდან ხალხის რაოდენობა არ არის საკმარისი.

პარლამენტთან ნაციონალური მოძრაობის თავმჯდომარის, ნიკა მელიას მხარდასაჭერად ოპოზიციის აქცია მიმდინარეობს. მსვლელობა ფილარმონიასთან დაიწყო და საქართველოს პარლამენტთან გაგრძელდა. ოპოზიციის ლიდერები მელიას დაპატიმრებას აპროტესტებენ და მას მხარდაჭერას ასე უცხადებენ. ისინი ამბობენ, რომ პროტესტს არ შეწყვეტენ.

23 თებერვალს, სპეცრაზმმა ნიკა მელია დააკავა. სამართალდამცავები პარტიის ოფისში გამთენიისას გამოჩნდნენ — რამდენიმე საათში მას შემდეგ, რაც ირაკლი ღარიბაშვილი პრემიერმინისტრად აირჩიეს.

სპეცრაზმი შენობაში შევიდა როგორც სახურავიდან, ისე პირველ სართულზე არსებული შესასვლელებიდან. თავდაპირველად, მათ პირველ სართულზე მყოფი ადამიანები გამოიყვანეს, მოგვიანებით კი, ნიკა მელიას ოთახს მიადგნენ, სადაც ის ოპოზიციის სხვა ლიდერებთან და მხარდამჭერებთან ერთად იმყოფებოდა. მათ ოთახში გამოიყენეს გაზიც. შსს-ს ინფორმაციით, მელიას გარდა, 21 ადამიანი დააკავეს. მათ პოლიციის კანონიერი მოთხოვნისადმი დაუმორჩილებლობას ედავებიან.

თავდაპირველად, ნიკა მელიას დაპატიმრება ყოფილი პრემიერმინისტრის, გიორგი გახარიას გადადგომის გამო გადაიდო. გადადგომა გახარიამ ნიკა მელიას საქმეს დაუკავშირა და თქვა, რომ გუნდში ამაზე "აზრთა სხვადასხვაობა" იყო.

17 თებერვალს თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა. საქმეს მოსამართლე ნინო ჩახნაშვილი განიხილავდა. აღსანიშნავია, აღკვეთის ღონისძიების შეფარდება არ ნიშნავს საბოლოო გადაწყვეტილებას — განხილვები ამის შემდეგაც უნდა გაგრძელდეს და სასამართლოს მაქსიმუმ 9-თვიანი ვადა აქვს, რომ საბოლოო ვერდიქტი გამოიტანოს. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.