ხობში, ყოფილი კინოთეატრის შენობაში, სპორტული კომპლექსის გახსნა იგეგმება, სადაც საჭიდაო მოედანი, ჭადრაკის დარბაზი, საბილიარდო, ფიტნესდარბაზი და საუნა მოეწყობა.

მშენებლობაზე, რომლის ღირებულება 2 500 000 ლარზე მეტია, 30 ადამიანია დასაქმებული, სამუშაოების დასრულება კი 2018 წლის გაზაფხულზე იგეგმება.

ფოტო: ხობის ელექტრონული არქივი

On.ge დაინტერესდა, რატომ შეირჩა მაინცდამაინც ყოფილი კინოთეატრის ტერიტორია სპორტკომპლექსის გასახსნელად.

"ქალაქში გვქონდა კინოთეატრი, რომელიც საბჭოთა კავშირის შემდეგ არ ფუნქციონირებდა, ამიტომ, მის ადგილზე სპორტკომპლექსი აშენდება. მათთვის კი, ვისაც კინოს ნახვა მოუნდება, საკონფერენციო დარბაზში გავუმართავთ ჩვენებებს", - ამბობენ ხობის მუნიციპალიტეტში.

ამ ფაქტთან დაკავშირებით დავუკავშირდით საქართველოს ეროვნულ კინოცენტრსაც, სადაც ხობის კინოთეატრში სპორტკომპლექსის გახსნას მავნე ტენდენციის კიდევ ერთი ფაქტი უწოდეს და თქვეს, რომ რეგიონში კინოს განვითარებაზე აქტიურად მუშაობენ.

"ეს არის მავნე ტენდენცია, რომელიც, სამწუხაროდ, გრძელდება. პროექტორის მინათება კედელზე და ფილმის გაშვება, რა თქმა უნდა, არ არის კინო. მავნე ტენდენცია გრძელდება, კინოთეატრები იყიდება, სახელმწიფოს კი ამაზე საკუთარი პოზიცია არ გააჩნია. კინოცენტრი მუშაობს ამ საკითხზე, მაგრამ ჯერ რა და როგორ იქნება, სამწუხაროდ, არ ვიცით", - ამბობს კინოცენტრის რეგიონალური პროექტების დეპარტამენტის ხელმძღვანელი კოტე ჩლაიძე.