საქართველოს პრემიერმინისტრობის კანდიდატის, ირაკლი ღარიბაშვილის განცხადებით, ოკუპირებული ცხინვალის იზოლატორში მოკლული არჩილ ტატუნაშვილის გარდაცვალება ნაციონალური მოძრაობის "უგუნური პოლიტიკის შედეგია".

"მინდა ვისარგებლო შემთხვევით და ქედი მოვიხარო ჩვენი გმირის, არჩილ ტატუნაშვილის ხსოვნის წინაშე. დღეს არის მისი გარდაცვლაბის დღე და ჩვენ ყველამ ერთად უნდა დავგმოთ რუსული ოკუპაცია, რომლის შედეგი არის არჩილ ტატუნაშვილის მაგალითი. მაგალითი და რეალურად ეს არის იმ გუგუნური პოლიტიკის შედეგი, რომელიც ნაც. მოძრაობის ხელისუფლების განახორციელა ჩვენს ქვეყანაში", — განაცხადა ღარიბაშვილმა პარლამენტის ტრიბუნიდან სიტყვით გამოსვლისას.

არჩილ ტატუნაშვილი 2018 წლის 22 თებერვალს საოკუპაციო რეჟიმმა ახალგორში უკანონოდ დააკავა, რის შემდეგაც ცხინვალის იზოლატორში გარდაიცვალა. ექსპერტიზამ დაადგინა, რომ ტატუნაშვილს სიცოცხლისთვის შესაუბამო მრავლობითი დაზიანებები აღენიშნებოდა. მისი წამების ბრალდებით, საოკუპაციო რეჟიმის წარმომადგენლებზე, დავით გურწიევსა და ალიკ ტაბოევზე ინტერპოლით ძებნაა გამოცხადებული.

სახელმწიფომ ტატუნაშვილის გარდაცვალებაზე პასუხისმგებლობა რუსეთს დააკისრა და იუსტიციის სამინისტრომ ქვეყნის წინააღმდეგ სტრასბურგის სასამართლოში სარჩელი შეიტანა. შინაგან საქმეთა მინისტრის მაშინდელი მოადგილე, ამჟამად კი პრემიერის მოადგილე კახა საბანაძე აცხადებდა, რომ ტატუნაშვილის მკვლელების კანონის სრული სიმკაცრით დასასჯელად ყველაფერს გააკეთბდნენ.