საქართველოს პრემიერმინისტრობის კანდიდატის, ირაკლი ღარიბაშვილის თქმით, პრემიერმინისტრის რანგში ერთ-ერთ პირველ ვიზიტს აზერბაიჯანში გამართავს. მისი თქმით, მას აზერბაიჯანის პრეზიდენტთან, ილჰამ ალიევთან "ძალიან კარგი ურთიერთობა" აქვს და სჯერა, რომ შეძლებენ საერთო ენის გამონახვას საზღვრის დელიმიტაცია-დემარკაციის საკითხთან დაკავშირებით.

"აზერბაიჯანი არის ჩვენი ძალიან ახლო მეგობარი, სტრატეგიული პარტნიორი ქვეყანა, რომელსაც მართავს ბრძენი მმართველი, ბატონი ალიევი, რომელთანაც მე მაქვს ძალიან კარგი ურთიერთობა. ერთ-ერთი პირველი ვიზიტი, ალბათ, აზერბაიჯანში შედგება. იმის მიხედვით, რა თქმა უნდა, როგორც კოვიდ-სიტუაცია მოგვცემს საშუალებას.

ჩვენ გვექნება დიალოგი აზერბაიჯანთან, ჩვენს მოძმე სახელმწიფოსთან. მე მჯერა, რომ ბატონი ალიევი და ჩვენი მეგობარი აზერბაიჯანული მხარე მიიღებს გონივრულ გადაწყვეტილებას და ჩვენ მივიღებთ გონივრულ გადაწყვეტილებებს. ჩვენ შევძლებთ მოლაპარაკებას და საერთო ენის გამონახვას. ჩვენ ეს არ გაგვიჭირდება", — განაცხადა ირაკლი ღარიბაშვილმა.

ღარიბაშვილმა ექსპრეზიდენტი, მიხეილ სააკაშვილი, აზერბაიჯანთან საზღვრის დემარკაციის პროცესში, ქვეყნის ინტერესების საზიანო გადაწყვეტილებების მიღებაში დაადანაშაულა.

"აქაც [აზერბაიჯანთან საზღვრის დემარკაციის პროცესი] თვალსაჩინო მაგალითი ღალატის და ჩვენი სახელმწიფოებრივი ინტერესების საზიანო გადაწყვეტილებების მიღების სააკაშვილის მიერ, უშუალოდ მის მიერ", — ამბობს ღარიბაშვილი.

დღეს პარლამენტი ახალ მინისტრთა კაბინეტს და პრემიერმინისტრობის კანდიდატს, ირაკლი ღარიბაშვილს ოფიციალურად დაამტკიცებს. ღარიბაშვილმა 19 თებერვალს ორი ახალი მინისტრი წარადგინა. თავდაცვის მინისტრის პოსტს ჯუანშერ ბურჭულაძე დაიკავებს, ხოლო რეგიონული განვითარების და ინფრასტრუქტურის მინისტრის თანამდებობაზე მაია ცქიტიშვილს მისი მოადგილე, ირაკლი ქარსელაძე შეცვლის.

გაიგეთ მეტი: