ქართული ოცნების დეპუტატის, გია ვოლსკის განცხადებით, ცენტრალური საარჩევნო კომისიის თავმჯდომარეს, თამარ ჟვანიას "არაფერი არ დაუშავებია და თავის ადგილზე არის". ამის შესახებ მან პარლამენტში ჟურნალისტებთან ისაუბრა და თქვა, რომ ჟვანიას გარშემო გადადგომის "თემის დატრიალების" საფუძველი არ არის.

"ისეთი შეკითხვაა დასმული, თავად უნდა თქვას. გეგონება რამე დააშავა. ფაქტია, რომ თამარ ჟვანიას ცენტრალური საარჩევნო კომისიის მონაცემები ზუსტად დაემთხვა, სამართლიანი არჩევნების, პარალელური დათვლის მონაცემებს [...] ახლა თამარ ჟვანიაზე — გადადგება, არ გადადგება, შეიძლება საერთოდ კონფიგურაცია შეიცვალოს ამ საკითხზე. ისე მსჯელობთ, გეგონება, რაღაც დააშავა და უნდა გადადგეს. არაფერი არ დაუშავებია, თავის ადგილზე არის. საფუძველი იმისა, რომ რაღაცა მის გარშემო უნდა დატრიალდეს გადადგომის თემა, ეს არ არის", — აცხადებს ვოლსკი.

ოპოზიციის ნაწილი 2020 წლის 31 ოქტომბერს ჩატარებული საპარლამენტო არჩევნების შედეგებს არ აღიარებს. მათ უარი თქვეს არჩევნების მეორე ტურში მონაწილეობასა და საპარლამენტო მანდატებზე. პოლიტიკური კრიზისიდან გამოსასვლელად მმართველ პარტიასა და ოპოზიციას შორის მოლაპარაკებები აშშ-სა და ევროკავშირის ელჩების შუამავლობით მიმდინარეობდა. უკვე გაიმართა მოლაპარაკებების ოთხი რაუნდი. ოპოზიციამ მმართველ პარტიას მთავარი მოთხოვნები წამოუყენა. მათ შორისაა, რიგგარეშე არჩევნები, თამაფრ ჟვანიას გადადგომა და პოლიტპატიმრების გათავისუფლება.