რუსეთის საგარეო საქმეთა სამინისტრომ ქვეყანაში მყოფ უცხოელ დიპლომატებს კორონავირუსის წინააღმდეგ Sputnik V-ის ვაქცინის გაკეთება შესთავაზა. ინფორმაცია ამის შესახებ გამოცემა კომერსანტმა გაავრცელა და უწყებაშიც დაადასტურეს.

საგარეო საქმეთა სამინისტროში აცხადებენ, რომ ვაქცინაციის კამპანიაში უცხოელი დიპლომატების მოწვევა საერთაშორისო პრაქტიკაა. საუბარია 12 თას დიპლომატზე და მათი ოჯახის წევრებზე. იანვარში ვაქცინა იტალიის ელჩმა მიიღო.

როგორც გამოცემა კომერსანტი წერს, დსთ-ს, აზიის, აფრიკისა და ლათინური ამერიკის დიპლომატებმა შეთავაზება მიიღეს. ევროპული ქვეყნების საელჩოებში Sputnik V-ის გაკეთება არ იკრძალება, თუმცა მოუწოდებენ თავი შეიკავონ, სანამ ვაქცინას ევროპის წამლის სააგენტო არ დაამტკიცებს. ერთ-ერთი დიპლომატის თქმით, იმის გამო, რომ Sputnik V ევროკავშირში რეგისტრირებული არაა, გვერდითი ეფექტების შემთხვევაში დაზღვევას ვერ გამოიყენებენ.

გარდა ამისა, კომერსანტი წყაროზე დაყრდნობით წერს, რომ აშშ-ს ელჩმა, ჯონ სალივანმა უარი თქვა Sputnik V-ის ვაქცინის გაკეთებაზე, რომელიც რუსეთის მოქალაქეებისთვის არის განკუთვნილი.

17 თებერვალს The Washington Post-მა გაავრცელა ინფორმაცია, რომ ამერიკელმა დიპლომატებმა რუსული ვაქცინის გაკეთება ითხოვეს, რადგან მათ ეეჭვებათ, რომ უახლოეს პერიოდში ამერიკულ ვაქცინას მიიღებენ.

ამავე თემაზე: