20 ოპოზიციური პარტია და 2 პოლიტიკოსი ნიკა მელიას მხარდამჭერ განცხადებას ავრცელებს, რომელშიც აღნიშნულია, რომ მხარს უჭერენ ნაციონალური მოძრაობის გადაწყვეტილებას წინააღმდეგობა გაუწიოს ქართული ოცნების სვლას ავტორიტარიზმისკენ. მათი განცხადებით, დღევანდელი გადაწყვეტილება პოლიტიკური რეპრესიების დრამატულ ეტაპზე გადასვლისკენ მიუთითებს.

"ქართული ოცნების მთავრობის დღევანდელი გადაწყვეტილება, დააკავოს ნაციონალური მოძრაობის თავმჯდომარე, ნიკა მელია მიანიშნებს პოლიტიკური რეპრესიების უფრო დრამატულ ეტაპზე გადასვლისკენ", — წერია განცხადებაში.

მათი თქმით, მელიას აბსურდულ და შეთითნხილ საქმეში ედება ბრალი. ტექსტში აღნიშნულია ისიც, რომ 8 მარტის შეთანხმების შემდეგ არ გაათავისუფლეს ყველა პოლიტპატიმარი და წამოიწყეს ახალი პოლიიტკურად მოტივირებული საქმეები.

სხვადასხვა ოპოზიციური პოლიტიკური პარტიის ლიდერები ამბობენ, რომ ფარად დაუდგებიან მელიას და მისი დაკავების უფლებას არ მისცემენ, რადგან უკანონო გადაწყვეტილებას არ ემორჩილებიან. ისინი ნაციონალური მოძრაობის ოფისში ნიკა მელიასთან ერთად არიან შეკრებილები და მორიგეობას გეგმავენ.

თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა. საქმეს მოსამართლე ნინო ჩახნაშვილი განიხილავდა. აღსანიშნავია, აღკვეთის ღონისძიების შეფარდება არ ნიშნავს საბოლოო გადაწყვეტილებას — განხილვები ამის შემდეგაც უნდა გაგრძელდეს და სასამართლოს მაქსიმუმ 9-თვიანი ვადა აქვს, რომ საბოლოო ვერდიქტი გამოიტანოს.