ინდური ფილმის, "ზიტა და გიტას" მსახიობ ჰემა მალინის საქართველოს მართლმადიდებელი ეკლესიის საპატრიარქოში ჯილდო ქველმოქმედებისთვის გადასცეს. ინფორმაციას ამის შესახებ საქართველოს კულტურის პალატა ავრცელებს.

ორგანიზაციის ინფორმაციით, რომლის ხელმძღვანელიც დავით ოქიტაშვილია, საპატრიარქოში გამართულ მიღებაზე, პატრიარქის თხოვნით, ჰემა მალინიმ ინდური ცეკვა შეასრულა და თან თითოეული ცეკვის ილეთის მნიშვნელობა განმარტა.

ოქიტაშვილის ორგანიზაციის განცხადებით, ინდოელმა მსახიობმა საჩუქრები პატრიარქისგანაც მიიღო.

როგორც ინტერპრესნიუსი წერს, ცნობილ ინდოელ მსახიობს ქველმოქმედებისთვის პალატის პრეზიდენტმა დავით ოქიტაშვილმა საპატიო ჯილდო გადასცა, კერძოდ, გულის ფორმის მინანქარი, გულსაკიდი. საქართველოს პატრიარქმა მას ღირსეული ჯილდო უწოდა. ჰემა მალინიმ განაცხადა, რომ ეს ჯილდო მისთვის განსაკუთრებულია და დღევანდელ შეხვედრას გაახსენებს.

ინდოელმა მსახიობმა პატრიარქს მიღებისთვის მადლობა გადაუხადა და მისი ინდოეთში ვიზიტის სურვილიც გამოთქვა.

"ზიტა და გიტა" 1972 წელს გადაღებული ინდური ფილმია, რომელიც იმ დროს დიდი პოპულარობით სარგებლობდა, მათ შორის საქართველოშიც.