პარლამენტარი, ლადო კახაძე ამბობს, რომ 100 წლის წინ, პანდემიის დროს იყო რეკომენდაცია და დავალება, რომ ადამიანებს ეტარებინათ პირბადე. იგი ვარაუდობს, რომ შესაძლოა ამ წესის დარღვევა გასულ საუკუნეშიც სანქცირებული ყოფილიყო. ეს განცხადება კახაძემ ჯანდაცვის კომიტეტის სხდომაზე გააკეთა, სადაც განიხილება კანონპროექტი პირბადის ტარების წესის განმეორებითი დარღვევისთვის ჯარიმის გაზრდის შესახებ.

"თითოეული ჩვენგანი, დაინტერესებული პირები და ექიმები განსაკუთრებით, ჩაუსხდნენ შინაარსს, რა გამოცდილება აქვს დედამიწას და აღმოჩნდა, რომ 100 წლის წინ ეს გამოცდილება [პანდემია] არსებობდა. ურთულესი გამოცდილება. მაშინ არ არსებობდა ბევრი რამე, რომელიც დღეს არსებობს და მიუხედავად ამისა, იქაც და აქაც ერთი წესი გაერთიანდა. ერთმა რამემ ის საუკუნე და ეს საუკუნე გააერთიანა. ეს ყველაფერი უკავშირდება პირბადეს.

თქვენ ვერ წარმოიდგენთ, იმ საუკუნეში, ყველა ინფორმაცია, სადაც არ უნდა ჩაწვდეს ადამიანი და წაიკითხოს, იქაც რეკომენდაცია, დავალება, თხოვნა და მერე კიდევ დამსჯელობითიც იყო იქ, ალბათ, რაღაც სანქცირებულიც იყო, ადმინისტრაციული პასუხისმგებლობა, რომ პირბადე, პირბადე, პირბადე, პირბადე და 100 წლის დაგროვილი მოწოდება დღესაც კიდევ, რატომღაც, შესახსენებელი გახდა და ადამიანების დარწმუნება იმაში, რომ პირბადე აუცილებელია", — განაცხადა ლადო კახაძემ.

დღეს, 16 თებერვალს, ჯანმრთელობის დაცვისა და სოციალურ საკითხთა და ადამიანის უფლებათა დაცვისა და სამოქალაქო ინტეგრაციის კომიტეტების ერთობლივ სხდომაზე, დეპუტატებმა ერთხმად დაუჭირეს მხარი კანონპროექტს, რომლის მიხედვითაც როგორც ღია, ისე დახურულ საჯარო სივრცეში, ასევე, საზოგადოებრივ ტრანსპორტში, პირბადის ტარების წესის განმეორებითი დარღვევა დაჯარიმდება 50 ლარით. კანონპროექტის ავტორები არიან კომიტეტის წევრები — ლადო კახაძე, რამინა ბერაძე და ზაზა ლომინაძე, ასევე, კომიტეტის თავმჯდომარე, დიმიტრი ხუნდაძე.

2020 წლის 12 ივნისიდან დღემდე პირბადის ტარების წესის დაღვევა რეგულირდება ადმინისტრაციულ სამართალდარღვევათა კოდექსით და ითვალისწინებს ჯარიმას 20 ლარის ოდენობით.