ქართული ოცნების დეპუტატის, ანრი ოხანაშვილის თქმით, პარლამენტი "არ წარმოადგენს სასამართლოს", შესაბამისათ მათ არ აქვთ უფლებამოსილება, შევიდნენ სამართლებრივ დავებში.

"უნდა განვიხილოთ საკითხი, ამ პირმა დაარღვია თუ არა საქართველოს კანონმდებლობა, როცა მან უარი თქვა გამკაცრებული გირაოს გადახდაზე და არის თუ არა ამ პირობაზე დაყრდნობით გენერალური პროკურატურის შუამდგომლობა. ჩვენ არ ვართ სასამართლო. ჩვენ არ გვევალება და არ გვაქვს უფლება ისეთ სამართლებრივ განხილვებში და მასალებში შევიდეთ, რომელიც არის სასამართლოს პრეროგატივა", — განაცხადა ოხანაშვილმა.

მან, ასევე, მოუწოდა ნიკა მელიას, თუ აქვს სურვილი, შეუძლია კომიტეტის ფარგლებში კითხვები დასვას.

"მე ველოდები და მოვუწოდებ ოპოზიციონერ დეპუტატებს, ყველა დეპუტატს, რომელმაც ხალხის მანდატით მიიღეს წარმომადგენლობის უფლება, ისინი ვინც პარლამენტში შემოვიდნენ და ისინი ვინც არ შემოვიდნენ. თუ აქვთ შეკითხვები, პარლამენტის წევრებმა ერთად დავსვათ. ეს სასამართლო პროცესი ვერ იქნება. მე ველოდები და მოვუწოდებ, თუნდაც ბატონ ნიმანორ მელიას, თუ რამე აინტერესებს, კომიტეტის ფარგლრში დავსვათ [კითხვები]", — განაცხადა ოხანაშვილმა.

რაც შეეხება ადვოკატებს, ჩვენ უნდა მივცეთ შესაძლებლობა მათ და ბრალდების მხარეს პაექრობა გადაწყვიტონ სასამართლოში.

[მელიას ადვოკატების არ შემოშვებაზე] კომიტეტები სწავლობენ კონკრეტულ საკითხს, კონკრეტულმა დეპუტატმა, ნიკანორ მელიამ დაარღვია თუ არა ის პირობა, რომელიც მას კანონმდებლობით დაეკისრა და ეს დაარღვია თუ არა, შესაბამისად აქვს თუ არა გენერალურ პროკურორს შესაბამისი მომართვის საფუძველი. ჩვენ ეს უნდა განვიხილოთ და გადავწყვიტოთ, მივცეთ შესაძლებლობა ადვოკატებსა და ბრალდების მხარეს პაექრობა გადაწყვიტოს სასამართლოში. ჩვენ არ ვართ სასამართლო. ჩვენ ვაძლევთ შესაძლებლობას საკუთარი არგუმენტები გაცვალონ სასამართლოს წინაშე", — განაცხადა ოხანაშვილმა.

ანრი ოხანაშვილმა კიდევ ერთხელ მოუწოდა ოპოზიციონერებს შემოდით პარლამენტში და კითხვები დასვუთო.

"თუ ისინი არ მოდიან და ამ შეკითხვებს არ სვამენ, ეს არის ერთადრთი რამის მაჩვენებელი, ან არ აქვთ შეკითხვები, ან ისინი დარწმუნებული არიან, რომ ბატონმა მელიამ დაარღვია კანონი", — თქვა მან.

დღეს პარლამენტის პლენარულ სხდომაზე ნიკა მელიას მანდატის შეწყვეტაზე იმსჯელებენ.

12 თებერვალს მელიას დაკავებისთვის გენერალურმა პროკურატურამ პარლამენტს მიმართა. იმის გამო, რომ მელია ოფიციალურად პარლამენტის დეპუტატია, მას იმუნიტეტი იცავს.

გენერალურ პროკურატურას მელიასთვის იმუნიტეტის მოხსნა სჭირდება იმისთვის, რომ სასამართლოს პატიმრობის შუამდგომლობით მიმართოს. იმუნიტეტის მოხსნი საკითხი კი პარლამენტის პლენარულ სხდომაზე უნდა გადაწყდეს.

პროკურატურამ ნიკა მელიას ერთკვირიანი ვადა მისცა, რათა გირაოს თანხა გადაეხადა, რომელიც მას ელექტრონული სამაჯურის მოხსნის შემდეგ დაეკისრა. ეს ვადა სწორედ 12 თებერვალს ამოიწურა. მელიამ გირაოს გადახდაზე უარი თქვა, რადგან მიაჩნია, რომ საქმე პოლიტიზებულია.

ამავე საქმეზე ნიკა მელიასთვის იმუნიტეტის შეწყვეტა პროკურატურამ 2019 წლის ივნისშიც მიმართა. მაშინ პარლამენტმა მხარი დაუჭირა მელიასთვის იმუნიტეტის მოხსნას და პროკურატურას მისი დაკავების უფლება თუმცა სასამართლომ მას პატიმრობის ნაცვლად გირაო შეუფარდა.

ნიკა მელიას საქმე

ნიკა მელიას საქართველოს პროკურატურა 20 ივნისის აქციის საქმეზე ძალადობრივი ჯგუფის ხელმძღვანელობას ედავება.

2019 წლის 27 ივნისს თბილისის საქალაქო სასამართლომ მას 30 ათასი ლარის ოდენობის გირაო შეუფარდა. გარდა ამისა, მოსამართლემ სხვა შეზღუდვებიც დაუწესა:

  • საცხოვრებელი ადგილის (სახლის) დატოვება საგამოძიებო ორგანოს ინფორმირებისა და თანხმობის გარეშე;
  • საზოგადოებრივი თავშეყრის ადგილას საჯარო განცხადებების გაკეთება; მოწმეებთან ნებისმიერი სახის კომუნიკაცია;
  • დაეკისრა საგამოძიებო ორგანოსთვის პასპორტისა და პირადობის დამადასტურებელი სხვა დოკუმენტის ჩაბარების ვალდებულება.

2020 წლის 1 ნოემბერს არჩევნებთან დაკავშირებულ საპროტესტო აქციაზე მელიამ ელექტრონული მონიტორინგისთვის განკუთვნილი სამაჯური მოიხსნა და განაცხადა რომ მას აღარ გაიკეთებდა.

ამის შემდეგ, პროკურატურამ აღკვეთის ღონისძიების გამკაცრება, კერძოდ, გირაოს გაზრდა 100 ათას ლარამდე მოითხოვა. თბილისის საქალაქო სასამართლოს 2020 წლის 3 ნოემბრის განჩინებით, მელიას მიმართ მანამდე გამოყენებული აღკვეთის ღონისძიება გამკაცრდა და გირაოს ოდენობად 70 ათასი ლარი შეეფარდა.