ევროპული საქართველოს თავმჯდომარის, დავით ბაქრაძის თქმით, პარტია საარჩევნო სტრატეგიამ მიიყვანა არასასურველ შედეგამდე, მათ შორის, ღრმა პრობლემებამდე. ამის შესახებ მან მთავარ არხთან განაცხადა.

"ფაქტია, რომ ჩვენმა საარჩევნო სტრატეგიამ მიგვიყვანა არასრულ 4%-იან შედეგამდე, მიგვიყვანა ძალიან ღრმა პრობლემებამდე. [...] როცა მიდიხარ ცუდ შედეგამდე, ერთი გზა არის, რომ ეძებო დამნაშავეები და ეცადო, რომ სხვაზე გადატეხო, მეორე გზა არის, რომ როგორც ლიდერმა, აიღო პასუხისმგებლობა", — განაცხადა ბაქრაძემ.

მან, ასევე, ინტერვიუს დაწყებამდე განაცხადა, რომ მის თითოეულ ფრაზას რეფრენად გასდევს, რომ "არჩევნები გაყალბდა", ამიტომ ამას ყველგან არ გაიმეორებდა.

პარტიის ორმა ლიდერმა, თავმდჯომარე დავით ბაქრაძემ და გენერალურმა მდივანმა, გიგი უგულავამ რამდენიმე დღის წინ განაცხადეს, რომ მომდევნო ყრილობაზე თანამდებობაზე კენჭს აღარ იყრიან. მათი თქმით, კარგი იქნებოდა, იგივე გადაწყვეტილება ბოკერიასაც მიეღო. ბოკერიას თქმით, მსგავსი გადაწყვეტილება არ მიუღია.

ბაქრაძე და უგულავა აცხადებენ, რომ თუ პარტია "ბოკერიას პარტიად" გადაიქცევა, ისინი, შესაძლოა, პარტიიდანაც წავიდნენ.

ევროპულ საქართველოში დაგეგმილი სტრუქტურული ცვლილებების შესახებ ინფორმაცია On.ge-მ 9 თებერვალს გაავრცელა. პარტიაში არ ადასტურებდნენ, რომ შესაძლოა, დავით ბაქრაძემ ევროპული საქართველო დატოვოს. თუმცა, ისინი ადასტურებდნენ, რომ 2020 წლის საპარლამენტო არჩევნების შემდეგ პარტიაში ცვლილებებზე დაიწყეს საუბარი.