ევროპული საქართველოს თავმჯდომარის, დავით ბაქრაძის განცხადებით, პოლიტიკური კულტურის ნაწილია, როდესაც ლიდერი იღებს პასუხისმგებლობას პარტიის შედეგზე. მისივე თქმით, პასუხისმგებლობას იღებს არა იმიტომ, რომ ეს არის ლიდერის ბრალი, არამედ იმიტომ, რომ, როდესაც პარტიის შედეგი არის უარესი, თუნდაც გაყალბებით, ლიდერმა უნდა აიღოს თავის თავზე პასუხსიმგებლობა და უნდა გადადგას შესაბამისი ნაბიჯი.

"მიმაჩნია, რომ თანამედროვე პოლიტიკური კულტურის ნაწილია, როდესაც ლიდერი იღებს პასუხისმგებლობას პარტიის შედეგზე. ამ პასუხისმგებლობას იღებს არა იმიტომ, რომ ეს არის ლიდერის ბრალი, გულწრფელად გეტყვით, რომ ამ პარტიაში ძალიან ბევრი მხარდამჭერის ხმა იყო იმიტომ, რომ ისინი მხარს უჭერდნენ დათო ბაქრაძეს, ამიტომ ბრალეულობაზე არ არის საქმე, საუბარია პასუხისმგებლობაზე და მე როგორც ლიდერს, მიმაჩნია, რომ უნდა ვიყო პასუხისმგებლობის მაგალითი იმაზე, რომ როდესაც პარტიის შედეგი არის უარესი, თუნდაც გაყალბებით, მაგრამ არის უარესი იმის, ვიდრე უნდა იყოს, ლიდერმა უნდა აიღოს თავის თავზე პასუხსიმგებლობა და უნდა გადადგას შესაბამისი ნაბიჯი", — განაცხადა დავით ბაქრაძემ.

დავით ბაქრაძემ დღეს, 12 თებერვალს განაცხადა, რომ მომდევნო ყრილობაზე არ დააყენებს კანდიდატურას პარტიის თავმჯდომარის თანამდებობაზე. მისი თქმით, გადაწყვეტილება განახლების სურვილისა და პასუხისმგელობის გამო მიიღო. მისივე თქმით, სანამ ყრილობა ჩატარდება, პარტიაში რჩება.

მან, ასევე, თქვა, რომ პოლიტიკაში რჩება, მაგრამ პაუზას იღებს პარტიულ პოლიტიკაში. მისი თქმით, დიდი ხანია დაწყებული აქვს დისერტაცია, ასევე, აქვს შეთავაზებები სხვადასხვა უნივერსიტეტიდან.

ევროპულ საქართველოში დაგეგმილი სტრუქტურული ცვლილებების შესახებ ინფორმაცია On.ge-მ 9 თებერვალს გაავრცელა. პარტიაში არ ადასტურებდნენ, რომ შესაძლოა, დავით ბაქრაძემ ევროპული საქართველო დატოვოს. თუმცა, ისინი ადასტურებდნენ, რომ 2020 წლის საპარლამენტო არჩევნების შემდეგ პარტიაში ცვლილებებზე დაიწყეს საუბარი.