ზურაბ ჭიაბერაშვილმა, სავარაუდოდ, ევროპული საქართველო დატოვა. ამის შესახებ მან თავის ბლოგზე დაწერა. ინფორმაციის დასაზუსტებლად On.ge-მ მასთან დაკავშირება სცადა, თუმცა ჭიაბერაშვილი სატელეფონო ზარებს და შეტყობინებებს არ პასუხობს.

"თუ რადიკალური ცვლილებები გვინდა, ყველამ ჩვენი თავიდან უნდა დავიწყოთ – ოპოზიციამ, ცალკეულმა პარტიებმა, თითოეულმა პიროვნებამ. ფაქტია, რომ ამ სახით გარღვევა არ ხდება. ამიტომ აუცილებლობად მიმაჩნია, გვერდზე გაწევით (და არა უკანდახევით), გზა დავუთმოთ მომავალ თაობას. ჩემს გარშემო უამრავ ახალგაზრდას ვხედავ, რომელსაც მე ვანდობდი მნიშვნელოვანი საზოგადოებრივი საქმეების მოგვარებას. გამოცდილება, რაც საჯარო სამსახურში 17-წლიანი მუშაობით დამიგორვდა, ეკუთვნის იმ ქვეყანას, რომლის სამსახური ჩემთვის პატივია. სოციალური მედია იძლევა იმის საშუალებას, რომ პერიოდულად ჩემი აზრი დაინტერესებულ ადამიანებს გავაცნო. წარმატებას ვუსურვებ ჩემს ქვეყანას", — წერს ჭიაბერაშვილი.

ევროპული საქართველოს ოფისში პარტიის წევრები და ლიდერები შეიკრიბნენ. როგორც ცნობილია, პარტიაში სტრუქტურული ცვლილებები იგეგმება, თუმცა რა სახის, ჯერ უცნობია.

ევროპულ საქართველოში დაგეგმილი სტრუქტურული ცვლილებების შესახებ ინფორმაცია On.ge-მ 9 თებერვალს მოიპოვა. გავრცელებული ინფორმაცია, რომ პარტია შესაძლოა დავით ბაქრაძემ დატოვოს, არც თავად მას დ არც პარტიის სხვა ლიდერებს არ დაუდასტურებიათ. თუმცა, ისინი ადასტურებენ, რომ 2020 წლის საპარლამენტო არჩევნების შემდეგ პარტიაში ცვლილებებზე დაიწყეს საუბარი.

გაიგეთ მეტი: