საქართველოს უსაფრთხოების სამსახურში აცხადებენ, რომ ოკუპირებული აფხაზეთის მიმართულებით გადაადგილება უახლოეს მომავალში ორმხრივად აღდგება. თუმცა, გარკვეული შეზღდუვები ძალაში რჩება.

"შესაძლოა, უახლოეს დღეებში, დღეს ან ხვალ ოკუპირებული აფხაზეთის მიმართულებით თავისუფალი გადაადგილება აღდგეს. რა თქმა უნდა ცალკეული რეგულაციების გამოყენებით", — განაცხადეს სუს-ში.

ამ განცხადების შემდეგ უწყებამ დამატებითი ინფორმაცია გაავრცელა და აღნიშნა, რომ 11 თებერვლიდან საოკუპაციო ხაზზე გადაადგილება ორმხრივად, ხანდაზმულებისთვის, პენსიონერებისთვის, განსაკუთრებული საჭიროების მქონე პირებისთვის და სხვა კატეგორიის ადამიანებისთვის გაიხსნა.

"12 თებერვალის დღის პირველი ნახევრიდან პენსიონერები, საკუთარი სურვილის შესაბამისად, საოკუპაციო ხაზზე შეძლებენ კუთვნილი პენსიის მიღებას", — განმარტავენ სუს-ში.

შერიგებისა და სამოქალაქო თანასწორობის საკითხებში სახელმწიფო მინისტრის, თეა ახვლედიანის განცხადებით, ენგურის ხიდზე გადასასვლელი ენგურის ხიდზე დღეიდან გაიხსნა. მისივე თქმით, თავდაპირველად შემსუბუქება გარკვეული ტიპის მოქალაქეებს შეეხებათ.

"საკარანტინე ვადა პირველ თებერვლამდე 12 დღის ვადით განისაზღვრებოდა, ამიერიდან ოკუპირებული რეგიონებიდან გადმომსვლელთათვის შექმნილი იქნება პირობები, სადაც ისინი დაყოფენ 5 დღეს საკარანტინე სივრცეში და PCR ტესტირების უარყოფითი შედეგისა და ხუთდღიანი საკარანტინე ვადის ამოწურვის შემდეგ მათ სივრცის დატოვების უფლება ექნებათ", — განაცხადა ახვლედიანმა.

კორონავირუსის პანდემიით გამოწვეული შეზღუდვების გამო ენგურის ხიდი ორივე მხრიდან თითქმის ერთი წელია, რაც ჩაკეტილია. მაშინ, როცა, ძირითადად, გალის რაიონის მცხოვრებლები დანარჩენ საქართველოში შემოვლითი გზებით ან ენგურის ხიდით გადმოდიოდნენ, სავალდებულო კარანტინის გავლა უწევდათ, რასაც ადგილობრივები აპროტესტებენდნ.

აფხაზეთის დე ფაქტო მთავრობამ ე.წ. საზღვარი საქართველოში კორონავირუსის გავრცელების მეორე დღიდან, თებერვლის ბოლოს ჩაკეტა.