ქართული ოცნების აღმასრულებელი მდივნის, მამუკა მდინარაძის განცხადებით, პარტია მოქალაქეების ლიდერები, ალეკო ელისაშვილი და ლევან იოსელიანი ცესკოს თავმჯდომარის, თამარ ჟვანიას შეცვლაზე საუბრით მძიმე შეცდომას უშვებენ.

"ვფიქრობ, როგორც ბატონი ელისაშვილი, ასევე, ბატონი იოსელიანი უშვებენ მძიმე შეცდომას. ისინი, ერთი მხრივ, საუბრობენ დემოკრატიისა და სამართლებრივ პრინციპებზე და მეორე მხრივ, კონკრეტულ გვარს ახსენებენ, როდესაც ვინმეს გარეშე ან ვინმესთან ერთად არჩევნების ჩატარებაზე საუბრობენ. როდესაც კონკრეტული ადამიანი გარკვეული ვადით არის არჩეული და მისი თანამდებობა არჩევითია, სულ რომ წინათგრძნობა და ხილვა გქონდეს და გჯეროდეს, რომ ნამდვილია [ეს, რა თქმა უნდა, ხუმრობით], არ შეიძლება კონკრეტულ გვარზე ილაპარაკო, რომელიც არჩეული თანამდებობის პირია", — განაცხადა მდინარაძემ.

მისივე თქმით, საარჩევნო რეფორმასთან დაკავშირებული სამუშაო ჯგუფის ფორმატში საუბარია საარჩევნო ადმინისტრაციის ცენტრალურ, საოლქო და საუბნო დონეზე კომისიების დაკომპლექტების წესის შეცვლაზე.

პარტია მოქალაქეებსა და ქართულ ოცნებას შორის მემორანდუმი 29 იანვარს გაფორმდა. სწორედ მის საფუძველზე შევიდნენ პარლამენტში ალეკო ელისაშვილი და ლევან იოსელიანი. დოკუმენტი რამდენიმე პუნქტს მოიცავს, მათ შორის, საარჩევნო ადმინისტრაციის ცვლილებას, საარჩევნო ბარიერებს და ხმის მიცემის პროცესის ახალ ტექნოლოგიებზე გადაყვანას.

მემორანდუმთან დაკავშირებით დღეს, 8 თებერვალს პარლამენტში სამუშაო ჯგუფის პირველი შეხვედრა გაიმართა. ოპოზიციონერი და მმართველი პარტიის დეპუტატების გარდა, მას არასამთავრობო ორგანიზაციებიც ესწრებოდნენ. როგორც ორგანიზაციების წარმომადგენლებმა შეხვედრის დასრულების შემდეგ განაცხადეს, მათ აქვთ რამდენიმე პრინციპული საკითხი, რომელიც დღეს გააჟღერეს.

გაიგეთ მეტი: