ვიცე-პრემიერის, მაია ცქიტიშვილის განცხადებით, მთავრობას უფრო უნდა შეზღუდვების მოხსნა, ვიდრე ეს შეიძლება, ოპოზიციურ პარტიებს უნდოდეთ. მისივე თქმით, თითოეული გადაწყვეტილება ეფუძნება ბალანსის პოვნას ეკონომიკასა და მოქალაქეების ჯანმრთელობას შორის.

ცქიტიშვილის განცხადებით, თვეების წინ, როცა დღეში ინფიცირების ხუთი ათასამდე შემთხვევა ფიქსირდებოდა, სხვადასხვა სახის ბიზნესის გაყიდვები 40 პროცენტით ნაკლები იყო, რადგან ადამიანებს ეშინოდათ რესტორანში მისვლა თუ სავაჭრო ობიექტებში საქონლის შეძენა.

"ჩვენ უფრო გვინდა შეზღუდვების მოხსნა, ვიდრე ეს შეიძლება უნდოდეს ოპოზიციურ პოლიტიკურ პარტიებს, მაგრამ ძალიან კარგად გვესმის რამხელა პასუხისმგებლობას ვატარებთ, როგორც ეკონომიკურ განვითარებაზე, ისე თანამოქალაქეების ჯანმრთელობაზე. ასეთ დესტრუქციულ ძალებს არ შეიძლება არ ესმოდეთ თუ რამდენად სახიფათოა დაუმორჩილებლობისადმი მოწოდებები და იმ განცდის შექმნა, რომ პანდემია თითქოს აღარ არსებობს, რომ მსოფლიომ პანდემია უკვე დაამარცხა და ამიტომ, არ გვჭირდება არანაირი შეზღუდვა", — აღნიშნა ვიცე-პრემიერმა.

მთავრობამ შეზღუდვების შემსუბუქების ახალი ტალღა დააანონსა, რომელიც ორ ეტაპად: 8 და 15 თებერვლიდან დაიწყება. კერძოდ:

  • ორშაბათიდან, 8 თებერვლიდან საქართველოში სრული მასშტაბით ამოქმედდება მუნიციპალური ტრანსპორტი: მეტრო, ავტობუსი და სამარშრუტო ტაქსები;
  • ორშაბათიდან, 8 თებერვლიდან ამოქმედდება ბაზრობები;
  • 15 თებერვლიდან საქართველოს მასშტაბით სწავლა საკლასო ოთახებში გაგრძელდება;
  • 15 თებერვლიდან კვების ობიექტები, მათ შორის, რესტორნები შეძლებენ იმუშაონ ღია სივრცეში.

შეზღუდვების თბილისში, რუსთავსა და ქუთაისში მოიხსნა, რადგან სხვა ქალაქებში ტრანსპორტი და კვების ობიექტები უკვე ფუნქციონირებდა, სწავლა კი საკლასო ოთახებში მიმდინარეობდა. რაც შეეხება ბაზრობებს მათი გახსნა 15 თებერვალს იყო დაანონსებული.