ქართული ოცნების დეპუტატის, მიხეილ ყაველაშვილის განცხადებით, ოპოზიციის მანდატების საკითხზე მათ პირადი შეხედულებები აქვთ, მაგრამ ამ ეტაპზე "ერთიანი პოზიცია" აირჩიეს, რათა მიეცეს ოპოზიციას შესაძლებლობა, საკუთარი პასუხისმგებლობა ქვეყნის წინაშე კვლავ გააანალიზოს.

"კიდევ ერთხელ მოვუწოდებთ მათ, რომ გააანალიზონ მათი არჩევანი და ის, რაც გამოხატა ქართველმა ამომრჩეველმა მათ სასარგებლოდ ასახონ პარლამენტში მუშაობით. ამ ეტაპისთვის თავს ვიკავებთ, ეს არის ჩვენი შეხედულება, ჩვენ გვაქვს პირადი შეხედულებები, პარტიის პოზიცია, დამოკიდებულება მათთან მიმართებაში, თუმცა ამ ეტაპისთვის ყველას ერთად, 51-ვე ოპოზიციონერს, ერთიან პოზიციას ვირჩევთ და თავს ვიკავებთ. მათ აქვთ კიდევ შესაძლებლობა, კიდევ კარგად გააანალიზონ საკუთარი ამომრჩევლის და ქვეყნის წინაშე პასუხისმგებლობა", — განაცხადა მან.

დღეს საპარლამენტო უმრავლესობამ პოლიტსაბჭოს მოსაზრება გაიზიარა და გადაწყდა, რომ ოპოზიციის მანდატებზე კენჭისყრა გადაიდება.

გუშინ, ქართული ოცნების პოლიტსაბჭოს სხდომის შემდეგ, პარტიის აღმასრულებელმა მდივანმა, მამუკა მდინარაძემ განაცხადა, რომ ოპოზიციონერი დეპუტატების მანდატებთან დაკავშირებით "მყარად და მკაფიოდ" ჩამოაყალიბეს პოზიცია, რომელსაც მხოლოდ მას შემდეგ გაახმოვანებენ, რაც საპარლამენტო უმრავლესობის წევრები ამ გადაწყვეტილებას დაადასტურებენ, ან უარყოფენ.

აღსანიშნია, რომ პარლამენტის თავმჯდომარემ, არჩილ თალაკვაძემ 30 იანვარს განაცხადა, რომ ოპოზიციისთვის მანდატების შეწყვეტაზე კენჭისყრა ვერ და არ გადაიდება. მისი თქმით, სურვილი აქვთ, პარლამენტი ისე იყოს წარმოდგენილი, როგორც საზოგადოებამ აირჩია, მაგრამ უკვე 3 თვე გავიდა, იყო არაერთი მოლაპარაკება და ოპოზიციას შესვლის სურვილი არ აქვს.

დღეს, 2 თებერვალს, პარლამენტის საგაზაფხულო სესია გაიხსნება. პლენარული სხდომაზე განსახილველი ერთადერთი საკითხი ოპოზიციონერი დეპუტატების უფლებამოსილების შეწყვეტაა.