საპარლამენტო უმრავლესობის ერთ-ერთი ლიდერი, ირაკლი ზარქუა ამბობს, რომ პატარა ოპოზიციურ პარტიებს კიდევ ერთი შანსი უნდა მიეცეთ დაფიქრდნენ და გადაწყვიტონ პარლამენტში შესვლა.

"თქვენ იცით, რომ დღეს უმრავლესობა ვიკრიბებით იმიტომ, რომ საბოლოო, შეჯერებული პოზიცია მივიღოთ. თქვენ იცით, რომ გაყოფილია აზრი უმრავლესობაში, ნაწილი ემხრობა შეწყვეტას [ოპოზიციის საპარლამენტო მანდატების], ნაწილი გაგრძელების მომხრეა.

ჩემი პირადი აზრია, რომ კიდევ ერთი შანსი უნდა მიეცეთ, განსაკუთრებით პატარა პარტიებს, თავიანთი ამომრჩევლის ხმა გაახმოვანონ პარლამენტში. თქვენ იცით, რომ პარლამენტი მრავალფეროვანი გახდა და დღეს დამატებით უფრო გახდება, მაგრამ, ის პატარა პარტიები, რომელთაც მისცა ხმა ამომრჩეველმა, ჩემთვის პირადად უფრო საინტერესოა, რომ მათი წარმომადგენლები იყვნენ პარლამენტში და არა ვთქვათ რადიკალური ე.წ. ოპოზიცია. ისინი ვიცით რას წარმოადგენენ", — განაცხადა ირაკლი ზარქუამ ქართული ოცნების ოფისში.

დღეს, დილიდან, ქართული ოცნების ოფისში პარტიის ლიდერები იკრიბებიან.

გუშინ, ქართული ოცნების პოლიტსაბჭოს სხდომის შემდეგ, პარტიის აღმასრულებელმა მდივანმა, მამუკა მდინარაძემ განაცხადა, რომ ოპოზიციონერი დეპუტატების მანდატებთან დაკავშირებით "მყარად და მკაფიოდ" ჩამოაყალიბეს პოზიცია, რომელსაც მხოლოდ მას შემდეგ გაახმოვანებენ, რაც საპარლამენტო უმრავლესობის წევრები ამ გადაწყვეტილებას დაადასტურებენ, ან უარყოფენ.

დღეს, 2 თებერვალს, პარლამენტის საგაზაფხულო სესია გაიხსნება. პლენარული სხდომაზე განსახილველი ერთადერთი საკითხი ოპოზიციონერი დეპუტატების უფლებამოსილების შეწყვეტაა.

პარლამენტის თავმჯდომარემ, არჩილ თალაკვაძემ 30 იანვარს განაცხადა, რომ ოპოზიციისთვის მანდატების შეწყვეტაზე კენჭისყრა ვერ და არ გადაიდება. მისი თქმით, სურვილი აქვთ, პარლამენტი ისე იყოს წარმოდგენილი, როგორც საზოგადოებამ აირჩია, მაგრამ უკვე 3 თვე გავიდა, იყო არაერთი მოლაპარაკება და ოპოზიციას შესვლის სურვილი არ აქვს.