გირჩი — მეტი თავისუფლების ლიდერის, ზურაბ ჯაფარიძის განცხადებით, მანდატების გაუქმების ვადის გახანგრძლივებაზე საუბარი მისი მხრიდან ერთი ადგილის თამაში იქნებოდა. ამის შესახებ მან TV პირველის ეთერში ისაუბრა და აღნიშნა, რომ სასაცილო ამბავია, როცა ქართული ოცნების ლიდერებს, არჩილ თალაკვაძესა და მამუკა მდინარაძეს "ეხვეწები", ვიღაცები პარლამენტიდან არ გაუშვან.

"მოლაპარაკებების რაუნდები რომ მიმდინარეობდა ყველამ იცოდა, რომ რაღაცა ვადები არსებობდა და მიუხედავად იმისა, რომ ვიცოდი არსებობდა, იმ მოლაპარაკებებზე მხოლოდ ასე ვიჯექი, რომ ამ ვადებში ისინი რაღაც პირობებზე უნდა წამოსულიყვნენ. ჯერ ერთი, მთელი თემის გადატანა იმაზე, რომ თითქოს მოლაპარაკებები არის პარლამენტში შესვლა-არშესვლაზე, სისულელეა, ტყუილია. არ არის შესვლა-არშესვლაზე ეს მოლაპარაკებები. ეს არის მთავარი თემა ოცნებისთვის, თორემ არასოდეს არ ყოფილა სხვა ოპოზიციური პარტიებისთვის, ყველასთვის მთავარი თემა. მაგიდასთან სხედან ოპოზიციური პარტიები, რომლებიც იძახიან, რომ მათ შორის, იმ 4-პუნქტიანი პირობების დაკმაყოფილების შემთხვევაშიც კი არ აპირებენ ისინი პარლამენტში შესვლას. ეს მათ შორის, მოლაპარაკებების მაგიდაზეც ისმოდა", — განაცხადა მან.

დღეს პარტია გირჩმა ქართული ოცნების დეპუტატებს მოუწოდა, არ დაუჭირონ მხარი ოპოზიციური პარტიების დეპუტატების უფლებამოსილების შეწყვეტას პარლამენტში. პარტიის განცხადებით, კოლეგებისთვის უფლებამოსილების შეწყვეტა მოლაპარაკების პროცესს აზრს დაუკარგავს, კრიზისს გააღრმავებს და შესაძლოა ის შეუქცევადი გახადოს.

პარლამენტის თავმჯდომარემ, არჩილ თალაკვაძემ 30 იანვარს განაცხადა, რომ ოპოზიციისთვის მანდატების შეწყვეტაზე კენჭისყრა ვერ და არ გადაიდება. მისი თქმით, სურვილი აქვთ, პარლამენტი ისე იყოს წარმოდგენილი, როგორც საზოგადოებამ აირჩია, მაგრამ უკვე 3 თვე გავიდა, იყო არაერთი მოლაპარაკება და ოპოზიციას შესვლის სურვილი არ აქვს.