პარლამენტის თავმჯდომარის, არჩილ თალაკვაძის განცხადებით, ოპოზიციისთვის მანდატების შეწყვეტაზე კენჭისყრა ვერ და არ გადაიდება. მისი თქმით, სურვილი აქვთ, პარლამენტი ისე იყოს წარმოდგენილი, როგორც საზოგადოებამ აირჩია, მაგრამ უკვე 3 თვე გავიდა, იყო არაერთი მოლაპარაკება და ოპოზიციას შესვლის სურვილი არ აქვს.

"თუ გირჩი ითხოვს, კიდევ გვაცადეთ და დაგველოდეთ, სამაგიეროდ, ოპოზიციის დანარჩენი ნაწილი 1 თვე გვამუნათებდა და ატყუებდა საზოგადებას, რომ პარლამენტი კანონს არღვევს, რომ ამ საკითხს ჩქარა არ განიხილავსო. არადა, სრული კანონის დაცვით და ვადების დაცვით ამ საკითხის განხილვა მოხდება 2 თებერვალს. ვერ გადაიდება და არ გადაიდება", — განაცხადა მან იმედის ეთერში.

მანვე აღნიშნა, რომ თუ "2-მა პოლიტიკურმა პარტიამ მოასწრო" და შეძლო საკუთარი გადაწყვეტილების დაყენება, მაშინ ჯერ კიდევ არის დრო და სხვებსაც შეუძლიათ შესვლა.

29 იანვარს ცნობილი გახდა, რომ პარტია მოქალაქეების წევრები ალეკო ელისაშვილი და ლევან იოსელიანი საპარლამენტო საქმიანობაში ჩართვას აპირებენ. მათი განცხადებით, ამის საფუძველი ქართულ ოცნებასთან მიღწეული შეთანხმება გახდა, საარჩევნო ადმინისტრაციის ცვლილებასთან დაკავშირებით.

ამ ეტაპზე პარლამენტში შესულია პრორუსული პარტიის, პატრიოტთა ალიანსის სიით მოხვედრილი რამდენიმე დეპუტატი, რომლებმაც ახალი პარტია ევროპელი სოციალისტები შექმნეს. სხვა ოპოზიციური პარტიები კი აცხადებენ, რომ ბოიკოტის რეჟიმში რჩებიან და პარლამენტში შესვლას არ აპირებენ.

რაც შეეხება გირჩს, ერთ-ერთი ლიდერის, იაგო ხვიჩიას განცხადებით, პარლამენტში მათ შესვლას აზრი არ აქვს, თუ არ შევა ნაციონალური მოძრაობაც, რომელსაც ოპოზიციიდან ყველაზე მეტი მანდატი ეკუთვნის.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში — რა ხდება პარლამენტში.