კომპანია Novavax-ის კორონავირუსის ახალმა ვაქცინამ დიდ ბრიტანეთში ეფექტიანობის 89,3 პროცენტი აჩვენა.

როგორც BBC-ს სამედიცინო რედაქტორი, ფერგუს უოლში ამბობს, Novavax ეფექტურია ბრიტანეთში აღმოჩენილი ახალი შტამის წინააღმდეგაც. თუ ვაქცინა დამტკიცდება, ბრიტანეთის მთავრობა 60 მილიონი დოზის შესყიდვას აპირებს.

Novavax-ში განაცხადეს, რომ ვაქცინამ 89,3-პროცენტიანი ეფექტიანობა კლინიკური ცდების მესამე ფაზაში აჩვენა, სადაც 18-84 წლის 15 ათასზე მეტი პირი იღებდა მონაწილეობას.

სამხრეთ აფრიკაში ჩატარებულ ცდებში, სადაც სამხრეთ აფრიკული შტამია გავრცელებული, ვაქცინამ 60-პროცენტიანი ეფექტიანობა გამოავლინა იმ პირებში, რომელთაც HIV არ აქვთ.

Novavax-ის აღმასრულებელი დირექტორი, სტენ ერკი ამბობს, რომ დიდ ბრიტანეთში ცდები იმდენად შთამბეჭდავი და კარგი იყო, რამდენადაც ამის იმედი ჰქონდათ, ხოლო სამხრეთ აფრიკაში — მოლოდინებს გადააჭარბა.

ამ ეტაპისთვის, დიდ ბრიტანეთს AstraZeneca-ს 100 მილიონი, ხოლო Pfizer-ის 40 მილიონი დოზა ვაქცინა აქვს შეკვეთილი. გაზაფხულისთვის დამატებით Moderna-ს 17 მილიონ ვაქცინას ელოდებიან. Pfizer-სა და Moderna-სგან განსხვავებით Novavax-ის შენახვა ჩვეულებრივ ტემპერატურაზეა შესაძლებელი.

ბრიტანეთის ხელისუფლების მიზანია, რომ თებერვლის შუა რიცხვებისთვის პრიორიტეტულ ჯგუფს, 15 მილიონამდე ადამიანს ვაქცინის პირველი დოზა უკვე მიღებული ჰქონდეს. ბოლო მონაცემებით, პირველი დოზა 7,4 მილიონზე მეტმა ადამიანმა უკვე გაიკეთა.